Jańa Eńbek kodeksi jumysshylardy qysqartýdyń 2 jaǵdaıyn kózdeıdi - T.Dúısenova

ASTANA. QazAqparat - Jańa redaktsııalanǵan Eńbek kodeksi jumysshylardy qysqartýdyń eki jaǵdaıyn kózdeıdi. Onyń biri - kásiporyn jabylyp nemese qaıta qurylyp, burynǵy eńbek sharttary ózgerse, ekinshi jaǵdaı - kásiporynnyń ónimdilik kólemi tómendese.

Bul týraly búgin Májiliste jańa Eńbek kodeksin tanystyra otyryp, Densaýlyq saqtaý jáne áleýmettik damý mınıstri Tamara Dúısenova málim etti.

«Qazirgi zańnama boıynsha jumysshylardy qysqartýdyń bir normasy bar, biraq ol norma kásiporyn qaıta qurylsa, kásiporynnyń jumysy quldyrasa nemese kerisinshe jaqsarsa, qoldanylmaıtyn norma. Sondyqtan, biz jańa Kodekske saı biz jumysshyny qysqartýdyń eki jaǵdaıyn anyqtadyq»,-dep túsindirdi T.Dúısenova.

Mınıstrdiń aıtýynsha, jańa redaktsııalanǵan Kodeks normasyna saı, endi jumys berýshi óz kásiporyny jabylyp nemese qaıta qurylǵan jaǵdaıda jáne kásipornyndaǵy ónimdilik kólemi azaıyp, ekonomıkalyq shyǵynǵa ushyrasa jumysshylaryn qysqarta alady. «Eger jumysshy birinshi jaǵdaı aıasynda qysqarýǵa ushyrasa jumys berýshi ony aldyn ala eskertip, 1 aılyq jalaqy kóleminde ótemaqy tóleıdi. Ekinshi jaǵdaıda jumys berýshi 15 kún buryn qaǵaz júzinde eskertý taratyp, oǵan 2 aılyq jalaqy mólsherinde ótemaqy tóleýi kerek», - dep túsindirdi ol.