Jańa ekonomıkalyq saıasatymyz azamattardyń ál-aýqatyn teń dárejede arttyrýǵa baǵyttalǵan - Toqaev

NUR-SULTAN. QazAqparat – Jańa ekonomıkalyq saıasatymyz ulttyq tabysty neǵurlym ádil bólýdi qamtamasyz etýge baǵyttalǵan. Bul týraly QR Prezıdenti Qasym-Jomart Toqaev Álemdik jáne dástúrli dinder lıderleriniń VII sezinde aıtty, dep habarlaıdy QazAqparat tilshisi.

«Qazaqstan ıadrolyq qarýǵa qarsy jahandyq qozǵalys kóshbasshylarynyń biri boldy. Biz uıym bolýǵa tıis Azııadaǵy ózara is-qımyl jáne senim sharalary jónindegi konferentsııaǵa bastamashylyq jasadyq. BUU Qaýipsizdik Keńesine, EQYU-ǵa jáne Islam yntymaqtastyǵy uıymyna tóraǵalyq ettik. Sondaı-aq óńirlik jáne jahandyq deńgeılerde damý salasyndaǵy syndarly kún tártibin qoldaımyz jáne ony ilgeriletý úshin barlyq kúsh-jigerimizdi salamyz», - dedi Memleket basshysy.

Qasym-Jomart Toqaev búginde Qazaqstan aýqymdy reformalar baǵdarlamasyn júzege asyrýǵa kiriskenine toqtaldy.

«Olardyń tabysy kóp jaǵdaıda bizdiń kópultty jáne kópkonfessııaly ultymyzdyń yntymaqtastyǵyna, sondaı-aq jerimizdegi beıbitshilik pen kelisimge baılanysty. Biz memleketimizdi tıimdi jáne gúldengen memleketke aınaldyrý úshin ádiletti Qazaqstan quryp jatyrmyz. Sondyqtan elimizdiń saıası transformatsııasyna basa nazar aýdaramyz. Jańa ekonomıkalyq saıasatymyz ulttyq tabysty neǵurlym ádil bólýdi qamtamasyz etýge jáne barlyq azamattyń ál-aýqatyn teń dárejede arttyrýǵa baǵyttalǵan», - dedi Memleket basshysy.