Jańa Ekologııalyq kodeks ónerkásiptiń jasyl energııa kózine kóshýine yqpal etedi - Toqaev
ASTANA. QazAqparat - Memleket basshysy Abý Dabı turaqty damý aptalyǵy» sammıtinde elimizde elektr energııasynyń 70 paıyzǵa jýyǵy kómirden óndiriletinin atap ótip, aldaǵy ýaqytta ónerkásip pen ekonomıkaǵa túbegeıli qurylymdyq ózgerister ákeletin aýqymdy sharalarǵa arnaıy toqtaldy, dep habarlaıdy Aqordanyń baspasóz qyzmeti.
Prezıdenttiń aıtýynsha, jańa Ekologııalyq kodeks ónerkásip korporatsııalarynyń jańartylatyn energııa kózderine kóshýine oń yqpal etedi.
– Kompanııanyń ekologııalyq jańǵyrýǵa quıatyn ınvestıtsııasynyń tolyq quny bıýdjetke tólenetin ekologııalyq tólemnen shegeriledi. Máseleniń normatıvtik-quqyqtyq retteý jaǵyna keler bolsaq, bıyl barlyq negizgi ónerkásip salalary úshin Eń úzdik qoljetimdi tehnıkalardyń (BAT) salalyq standarttar anyqtamalyǵyn ázirleý isi aıaqtalady. Kelesi satyda lastanǵan tabıǵattyń 80 paıyzyna jaýapty 50 iri korporatsııa osy standarttarǵa ótýi kerek, – dedi Qasym-Jomart Toqaev.
Memleket basshysynyń aıtýynsha, Qazaqstan – kómirtegi beıtaraptyǵyna qol jetkizý úshin uzaqmerzimdi strategııa qabyldaǵan Ortalyq Azııadaǵy alǵashqy el. Atalǵan strategııa ulttyq deńgeıde anyqtalǵan klımattyń ózgerýine qarsy kúres kórsetkishterine úles qosýdyń ońtaıly tásilderin aıqyndaıdy.
– Parnıktik gazdar shyǵaryndylaryna kvota bólý jáne kvotalardy saýdalaýdyń ulttyq júıesi aýaǵa taraıtyn shyǵaryndylardy azaıtýdy jáne energııa únemdeý tehnologııasyn damytýdy yntalandyratyn mehanızm retinde óz tıimdiligin dáleldedi. Bizdiń ortaq maqsatymyz – Parnıktik gazdar shyǵaryndylaryn saýdalaýdyń ulttyq jáne eýropalyq júıesindegi alshaqtyǵyn joıý. Bul sharalardyń barlyǵy Parıj konventsııasyndaǵy mindettemelerdi 2030 jylǵa qaraı tolyq oryndaýǵa múmkindik beredi, – dedi Memleket basshysy.
