Jańa ekokodeks: Zańsyz aǵash keskenderge jaza qalaı kúsheıtildi

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev jańa Ekologııalyq kodekske sáıkes, zańsyz aǵash keskenderge jaza qalaı kúsheıtilgenin aıtyp berdi, dep habarlaıdy QazAqparat tilshisi.

«Pandemııa ishki týrızmge suranysty arttyrdy. Biraq bul azamattardyń ekomádenıetiniń tómendigin de kórsetkenin atap ótý kerek. Qazaqstanda tabıǵaty erekshe jer kóp. Tabıǵı parkter, qoryqtar deısiz be, týrıster kelgennen keıin barlyq jerde qoqys jınalady. Árıne bul tabıǵatqa keri áserin tıgizbeı qoımaıdy. Oǵan qosa, keıingi kezde eldi mekenderde aǵashtar men butalardy zańsyz kesý, joıý jáne zaqymdaý faktileri tirkeldi», - dedi mınıstr búgin OKQ-da ótken baspasóz máslıhatynda.

Onyń aıtýynsha, Memleket basshysynyń tapsyrmasy boıynsha mınıstrlik múddeli memlekettik organdarmen birlesip osy tártip buzýshylyqtar úshin jazany kúsheıtýge baǵyttalǵan birqatar shara qabyldaǵan.

«Sonyń nátıjesinde Qyzyl kitapqa engen aǵashtardy zańsyz kesken, joıǵan, zaqymdaǵandarǵa 30 ese mólsherde kompensatsııalyq aǵash ektirý, sondaı-aq jeke jáne zańdy tulǵalarǵa tıesili nysandardyń irgeles aýmaǵyndaǵy jasyl jelekti ekpelerdi joıǵany úshin 10 ese mólsherde aǵash ektirý kózdeledi. Bul normalar qaǵıdalarda kózdelmegen edi. Odan bólek, orman zańnamasyn buzýdan kelgen zııannyń mólsherin esepteý úshin bazalyq mólsherlemelerge ózgerister engizý boıynsha jumys júrgizildi. Qyzyl kitaptaǵy árbir zańsyz kesilgen aǵash úshin zııandy óteý mólsheri 6 AEK-ten 1000 AKE-ke deıin ulǵaıtyldy. Budan basqa, Ákimshilik jáne Qylmystyq kodeksterge sanktsııalardy qatańdatý boıynsha ózgerister engizildi», - dedi ol.