Jańa bıýlleten, daýys berýshiler tizimi: saılaýǵa daıyndyq qalaı júrip jatyr
ASTANA. KAZINFORM — Konstıtýtsııalyq zańǵa sáıkes 2 tamyzda óńirlerdiń ákimdikteri árbir saılaý ýchaskesi boıynsha saılaýshylar tizimderin ýchaskelik saılaý komıssııalaryna usyndy. Saılaýshylar tizimderiniń elektrondyq nusqalary tıisti aýmaqtyq saılaý komıssııalaryna berildi. Osylaısha, zańnamada belgilengen kezekti kezeń boıynsha jumys tolyq oryndaldy.
Búgin elordada ótken Ortalyq saılaý komıssııasynyń otyrysynda OSK tóraǵasy Nurlan Ábdirov saılaýshylardy aqparattandyrý jumystaryn daýys berý kúnine deıin júıeli túrde jalǵastyrý kerek ekenin atap ótti.
— Endigi mindet — saılaýshylar tizimderiniń tolyqtyǵy men durystyǵyn qamtamasyz etý, azamattardyń ótinishteri boıynsha engiziletin ózgeristerdi ýaqytyly qaraý jáne olardy tizimderge engizý, — dedi ol.
12,6 mln saılaýshy bar
OSK múshesi Azamat Aımanakýmovtyń aıtýynsha, saılaýshylardyń tizimin qalyptastyrý Ortalyq saılaý komıssııasynyń 1 shildedegi alǵashqy otyrysynda berilgen qaýlysyna sáıkes júzege asty.
— Jergilikti atqarýshy organdar 2 tamyzda, ıaǵnı daýys berýge 20 kún qalǵanda saılaýshylardyń tizimin saılaý komıssııalaryna usyndy. Keshe barlyq aktini jınaqtadyq. Búgin jergilikti atqarýshy organdardyń ókilderi osy derekterdi jarııalady. Jıyntyq aqparatqa qaraǵanda, 12 mln 605 myń 788 saılaýshy tizimge engizilgen, — dep naqtylady Azamat Aımanakýmov Ortalyq saılaý komıssııasynyń otyrysynda.
Eń kóp saılaýshy Astana men Almaty qalalarynda, Almaty jáne Túrkistan oblystarynda tirkeldi.
Saılaý komıssııalary jumysyna kiristi
Nurlan Ábdirov osy aptadan bastap Ortsaılaýkom músheleri óńirlerge ınspektsııalyq saparǵa shyǵatyndyǵyn atap ótti. Olar barlyq oblys pen respýblıkalyq mańyzy bar qalalarda bolyp, aldaǵy naýqanǵa ınfraqurylymnyń daıyndyǵyn tekseretin bolady.
— Búginnen bastap ýchaskelik saılaý komıssııalary óz jumysyna kiristi. Barlyǵy 10 400-den astam saılaý ýchaskesi ashyldy. Saılaýdy uıymdastyrýǵa músheleriniń jalpy sany 71 myń adam bolatyn 10 600-den astam komıssııa tartylatyn bolady. 4-17 tamyz aralyǵynda biz Ortalyq saılaý komıssııasynyń múshelerimen jáne apparat qyzmetkerlerimen birge elimizdiń barlyq 20 óńirine ınspektsııalyq saparlarǵa shyǵamyz. Osy saparlar barysynda saılaý ýchaskeleriniń daıyndyǵy, olardyń materıaldyq-tehnıkalyq qamtamasyz etilýi, saılaýshylardy aqparattandyrý jumysynyń uıymdastyrylýy, Call-ortalyqtardyń qyzmeti baǵalanatyn bolady. Sonymen qatar, óńirlerge jasalatyn ınspektsııalyq saparlar barysynda aýmaqtyq saılaý komıssııalarynyń jumysyna, onyń ishinde saılaý komıssııalary múshelerin oqytý barysyna da erekshe nazar aýdarylady, — dedi Nurlan Ábdirov.
OSK Tóraǵasy 7 tamyzdan bastap árbir saılaýshyǵa daýys berýge qatysý quqyǵy bar azamattardyń tizimindegi ózi týraly derekterdiń durystyǵyn tekserý múmkindigi beriletinin eske saldy. Eger qandaı da bir ózgerister engizý qajet bolsa, saılaýshy dereý ýchaskelik saılaý komıssııasyna júgine alady. Mundaı ótinishter kelip túsken kúni dereý qaralady.
Bıýlleten nusqasy tanystyrdy
OSK múshesi Mıhaıl Bortnık OSK Quryltaı depýtattaryn saılaý jónindegi daýys berý bıýlleteniniń nysany men mátinin, olardy daıyndaý tártibi men qorǵanys dárejesin belgileıtinin atap ótti. Sonymen qatar Ortalyq saılaý komıssııasy saılaý bıýlletenderin daıyndaýdy jáne olardy aýmaqtyq saılaý komıssııalaryna jetkizýdi qamtamasyz etedi. Daýys berýge arnalǵan bıýlletenge jerebege sáıkes rettilikpen saıası partııalardyń ataýy jáne «Bárine qarsymyn» degen jol engiziledi. Saılaý bıýlletenderi ýchaskelik saılaý komıssııalaryna saılaýdan erte degende úsh kún buryn jáne saılaýdan keminde bir kún buryn jetkiziledi.
Atap aıtqanda, daýys berý bıýlleteniniń blankisi — eki jaqty, A4 formatynda. Túsi — kógildir tústi. Birinshi betinde — Qazaqstan Respýblıkasynyń Memlekettik Eltańbasy, bıýlletenniń ataýy. Ekinshi betinde — 2026 jylǵy 23 shildede ótkizilgen jerebe qorytyndysyna sáıkes retpen saıası partııalardyń ataýy jáne «Bárine qarsymyn» degen jol. Bıýlletenderdiń qorǵanys dárejesin belgileý jóninde usynystar ázirlendi. Olar ofsettik baspa tásilimen qoldanylatyn polıgrafııalyq qorǵanys ádisin, túsin, baspa qarpin jáne basqa da derekti qamtıdy. Respýblıka boıynsha saılaýshylar tizimine 12 605 788 saılaýshy engizilgen. Daýys berýge arnalǵan bıýlletender saılaý okrýgindegi saılaýshylardyń jalpy sanynyń 1 paıyzy rezervimen saılaý okrýgindegi saılaýshylardyń sanyna teń mólsherde ázirlenedi. Osyǵan baılanysty daýys berý bıýlletenderi 12 731 847 dana kóleminde daıyndalady.
Saılaýdaǵy onlaın-servıster
Qazaqstanda saılaýshylarǵa arnalǵan onlaın-servıster iske qosylady. Osy servısterdiń kómegimen ýchaskelik saılaý komıssııalarynyń músheleri azamattyń tirkelgen mekenjaıyn teksere alady. Bul ony saılaýshylar tizimine engizý úshin qajet. Ol úshin azamat tıisti ótinishpen júginýi tıis. Ekinshi servıs tirkeýi joq azamattarǵa saılaý ýchaskesiniń mekenjaıy boıynsha ýaqytsha tirkeýge turýǵa múmkindik beredi. Atalǵan eki servıs te qazaqstandyqtardyń saılaý quqyǵyn iske asyrýyna járdemdesýge baǵyttalǵan.
OSK tóraǵasynyń orynbasary Muhtar Ermannyń sózine qaraǵanda, eGov portaly arqyly servıske qol jetkizý quqyǵy berilgen ýchaskelik saılaý komıssııalarynyń músheleri azamattyń jazbasha ótinishi negizinde onyń turaqty tirkelgen mekenjaıy týraly málimet ala alady. Eger ótinish berýshiniń turaqty tirkelgen turǵylyqty jeri tıisti saılaý ýchaskesiniń shekarasy aýmaǵynda ekeni rastalsa, komıssııa ony saılaýshylar tizimine engizý týraly sheshim qabyldaıdy. Bul servıs 5106 saılaý ýchaskesinde qoljetimdi bolady. Sondaı-aq turǵylyqty jeri boıynsha tirkeýden shyǵarylǵan jáne buryn saılaýshylar tizimine engizilmegen azamattardyń saılaý quqyǵyn iske asyrý maqsatynda daýys berý kúni olardy saılaý ýchaskesi ornalasqan mekenjaı boıynsha ýaqytsha tirkeýge jol beriledi.
Aıta keteıik, búginge deıin Ortalyq saılaý komıssııasy shet memleketter men halyqaralyq uıymdardan 251 halyqaralyq baıqaýshyny akkredıttedi. Akkredıtteýge qatysty usynystar kelip túsken saıyn halyqaralyq baıqaýshylar týraly málimetter jańartylyp otyrady.
