Jańa Bıýdjet kodeksinen tsıfrlyq ekonomıkaǵa deıin: Úkimet jumysynyń negizgi nátıjesi jarııalandy
ASTANA. KAZINFORM –Memleket basshysynyń Joldaýlaryn júzege asyrý sheńberinde Úkimet memlekettik qarjy, ınfraqurylym, ınvestıtsııalar, tsıfrlandyrý jáne áleýmettik saıasat salasyndaǵy keshendi jumystary jalǵastyryp jatqanyn málimdedi. Jalpyulttyq josparlarda 180 is-shara qarastyrylǵan, olardyń keıbireýleri oryndaldy, qalǵandary qarqyndy júzege asyrylyp jatyr.
2026 jyldyń 1 qańtarynan bastap jańa Salyq kodeksi qoldanysqa endi. Onda salyqtar sanyn 20%-ǵa azaıtyldy, jeńildikter júıesi qaıta qaralyp, saralanǵan mólsherlemeler engizildi. Salyq júıesi ınvestıtsııalardy yntalandyrýǵa jáne «baılyqqa salynatyn salyqty» arttyrýǵa baǵyttalǵan. Salyqty ákimshilendirý Smart Data Finance júıesiniń kómegimen tsıfrlyq formatqa aýysyp jatyr.
Jańa Bıýdjet kodeksi memlekettik shyǵystardyń tıimdiligin kúsheıtti
Kodekste ekonomıkalyq tıimdiligi joǵary memlekettik ınvestıtsııalyq jobalardy josparlaý men basymdyq berý sapasyna basa nazar aýdarylǵan. Óńirlerdegi kassalyq alshaqtyq táýekelderin tómendetýge múmkindik beretin bıýdjettik ótimdilikti basqarýdyń jańa tetikteri engizildi.
Energetıka men kommýnaldyq ınfraqurylymdy jańartýǵa 13 trln teńge qarastyrylǵan
Ulttyq jańǵyrtý jobasy 200-den astam ınfraqurylymdyq kásiporyndy qamtıdy. 2025 jyly 6,6 myń shaqyrym ınjenerlik jeli jóndeldi, segiz kommýnaldyq kásiporyn «qyzyl aımaqtan» shyǵaryldy. 2026 jyly taǵy 12 myń shaqyrym jelini jóndep, taǵy segiz kásiporyndy tozý aımaǵynan shyǵarý josparlanyp otyr. Sonymen bir mezgilde, Smart Turmys kommýnaldyq ınfraqurylymdy baqylaýdyń biryńǵaı tsıfrlyq platformasy iske qosylady.
Tsıfrlyq kodeks jáne ekonomıka úshin jańa erejeler
Qańtar aıynda qabyldanǵan Tsıfrlyq kodeks platformalyq ekonomıka, úlken derekter jáne JI úshin biryńǵaı qaǵıdalar qalyptastyrdy. Sonymen qatar azamattardyń tsıfrlyq quqyqtary men jasandy ıntellektini qaýipsiz damytý qaǵıdattaryn bekitedi.
Investıtsııalar: kapıtal tartýdan jobalardyń sapasyna deıin
Investıtsııalyq saıasat qosylǵan quny joǵary jobalarǵa oıysa bastady. Investordy súıemeldeýdiń birinshi ótinishten bastap jobany júzege asyrýǵa deıingi tolyqqandy júıesi qalyptasyp jatyr. «Kazakh Invest» UK» AQ-nyń halyqaralyq jelisi keńeıip, «Báıterek» holdıngi janynan Investment Board qurylyp, «bir tereze» qaǵıdaty boıynsha Kazakhstan Investment House iske qosylyp jatyr.
AÓK-te ǵylymı ázirlemelerdi engizý úlesin 40%-ǵa deıin jetkizý josparlanyp otyr
Agrarlyq ǵylymdy damytýdyń 2029 jylǵa deıingi jol kartasy bekitildi. Ol tsıfrlyq tehnologııalardy engizýdi, ǵylymı uıymdardyń materıaldyq-tehnıkalyq bazasyn jańǵyrtýdy jáne zertteýlerdi bıznestiń naqty qajettilikterimen tyǵyz baılanystyrýdy kózdeıdi.
Qurylys kodeksi qalalardy damytýdyń jańa erejelerin belgileıdi
2026 jyldyń qańtarynda qabyldanǵan Qurylys kodeksi qala qurylysyn retteýdiń jańa negizin qalady. Onyń negizgi mindetteri — adamdar men nysandardyń qaýipsizdigi, rásimderdi ońaılatý jáne tsıfrlandyrý, sapa men jaýapkershilikti arttyrý, ınfraqurylym men jaıly qalalyq ortany damytý.
Memleket basshysynyń joldaýlaryn júzege asyrý el damýynyń negizgi baǵyttaryn — memlekettik qarjy men ınfraqurylymnan tsıfrlandyrýǵa, ınvestıtsııalar men adamı kapıtalǵa deıin qamtıdy. Negizgi nazar naqty sheshimderge, basqarý tıimdiligin arttyrýǵa jáne ekonomıkany tehnologııalyq jańartýǵa aýdarylyp otyr.
Úkimet Digital Qazaqstan jalpyulttyq strategııasyn júzege asyrý jónindegi is qımyl josparyn bekitkenin jazǵan edik.
