Jańa bıýdjet kodeksi: Ulttyq qordyń aqshasy eki baǵytqa ǵana jumsalady

ASTANA. KAZINFORM – Májilis depýtattary Bıýdjet kodeksin ekinshi oqylymda qabyldady.

Palata tóraǵasy Erlan Qoshanov depýtattar jańa kodekske daýys bergennen keıin qujattaǵy negizgi normalarǵa toqtaldy.

- Búgin biz óte mańyzdy zań qabyldadyq. Bul – elimizdiń qarjy júıesin reformalaý baǵytyndaǵy úlken, mańyzdy qadam. Búgin sol mańyzdy qadamdy jasadyq. Ózderińiz bilesizder, byltyr Prezıdent aldymyzǵa jańa ekonomıkalyq modelge kóshý týraly aýqymdy mindet qoıdy. Sonyń zańnamalyq negizdemesin qalyptastyryp jatyrmyz. Qazir Májiliste Salyq kodeksi qaralyp jatyr. Al búgin jańa Bıýdjet kodeksin qabyldap jatyrmyz.

Ótken aptada el bıýdjetin qaraǵan kezde de bıýdjet saıasaty tóńireginde qyzý pikirtalas boldy. Depýtattar aıtqan syn-eskertpelerdiń bári búgingi kodekste eskerildi, - dedi ol.

Aıtýynsha, Úkimetten kelgen Kodeks jobasyna depýtattar biraz tujyrymdamalyq ózgerister engizgen kórinedi.

- Ásirese Ulttyq qor qarajatyn tıimsiz jumsaý máselesi jıi kóterilgen bolatyn. Jańa bıýdjet kodeksinde sol qarajatty naqty maqsattarǵa jumsaý jóninde norma bekitildi. Endi Ulttyq qordyń aqshasy tek óndiriske nemese eldi mekenderdiń ómirlik mańyzy bar ınfraqurylymyna ǵana jumsalady.

Budan bólek kvazımemlekettik sektordaǵy dıvıdent saıasaty qaıta qaraldy. Bul da kóp jyldan beri aıtylyp júrgen áńgime. Biz osyny búgingi Bıýdjet kodeksinde zańdastyrdyq. «Samuryq-Qazyna» qorynyń kem degende 50 paıyz tabysy, al kvazımemlekettik kompanııalardyń 70 paıyz tabysy bıýdjetke aýdarylady. Bul buryn Úkimet qaýlysymen bekitilip kelse, endi Kodekske engizip otyrmyz, - dedi Májilis tóraǵasy.

Erlan Qoshanov jańartylǵan bıýdjet protsesinde 10 jylǵa arnalǵan uzaqmerzimdi boljam jasalatynyn atap ótti.

- Bul tásil qysqa merzimge jáne uzaq merzimge bıýdjet shyǵysyn durys josparlaýǵa, bıýdjetti tıimdi ıgerýge múmkindik beredi. Sonymen qatar, biz óńirlerdiń derbestigin odan ári arttyra túsemiz. Kodekste bıýdjet kiristeriniń bir bóligin respýblıkalyq deńgeıden jergilikti bılik organdary deńgeıine berý sharalary kózdelgen. Munyń bári keleshekte jergilikti resýrstardy tıimdi ıgerýge oń áser eteri sózsiz, - dedi spıker.