Jańa bıýdjet kodeksi Úkimettiń derbes jaýapkershiligin arttyrady — Májilis tóraǵasy

ASTANA. KAZINFORM — Bıýdjettiń ıgerilý barysy depýtattardyń basa nazarynda bolady. Bul týraly Májilis tóraǵasy Erlan Qoshanov málim etti.

— Memlekettik organdar naqty nátıjege qol jetkizýde bıýdjettik derbes bolady. Qarajatty ıgerý ǵana emes, dál osy jaıt olardyń tıimdiligine baǵa berýge negiz bolmaq. Eń bastysy, Ulttyq qor qarajaty tek strategııalyq maqsattar men ınvestıtsııaǵa jumsalady. Muny depýtattar qatań qadaǵalaıdy. Jyl saıyn Úkimet nysanaly ındıkatorlardy bıýdjet múmkindikterine oraı túzetip otyratyn. Biz oǵan jol berýge bolmaıtynyn birneshe ret ashyq aıttyq, — dedi Erlan Qoshanov Májilistiń jalpy otyrysynda.

Májilis spıkeriniń málimdeýinshe, memlekettik josparlaý júıesine qoıylatyn talap bıýdjetti josparlaý sapasyn jaqsartady ári memlekettik organdardyń strategııalyq basqarý baǵytyn aıqyndaı túsedi. 

— Aldyńǵy jyldary biz respýblıkalyq bıýdjetke dıvıdendter tóleýde de teńgerimsizdik baryn baıqadyq. Osy másele de jańartylǵan Bıýdjet kodeksinde rettelgen. Al kvazımemlekettik sektor kompanııalarynyń dıvıdend saıasaty qaıta qaraldy. Jalpy, jańa Bıýdjet kodeksi memlekettik qarjy júıesin tolyǵymen qaıta jańǵyrtyp, Úkimettiń derbes jaýapkershiligin arttyrýǵa tıis. Bıýdjetti atqarýǵa qatysty aıtylǵan búgingi usynystarǵa Úkimet basa mán berýi qajet ekenine taǵy da nazar aýdarǵym keledi. Bul másele árdaıym depýtattardyń baqylaýynda bolady. Jalpy, birlesken jumys úshin barshańyzǵa rızashylyǵymdy bildiremin. Palatalardyń aldaǵy birlesken otyrysynda osy máseleni talqylaýdy jalǵastyramyz, — dep tolyqtyrdy tóraǵa.

Buǵan deıin Erlan Qoshanov Ulttyq qor men syrttan qaryz alý ósip jatqanyn aıtqan edi. 

Sondaı-aq Ulttyq bank nege halyqqa Ulttyq qordy basqarý kórsetkishteri týraly ashyq esep bermeı otyrǵany týraly jazǵan edik.