Kásipkerlik kýbogynyń jeńimpazdary elimizdiń atynan álemdik chempıonatqa qatysady
ASTANA. KAZINFORM – Astana qalasyndaǵy Táýelsizdik saraıynda jastar kásipkerliginiń 30 jyldyq mereıtoılyq kýbogy – ENACTUS Kazakhstan National Expo 2025 kórmesi ótti. Bul – halyqaralyq ENACTUS baǵdarlamasy aıasyndaǵy eń úzdik stýdenttik jobalar usynylatyn jyl saıynǵy ulttyq kórme. Bul týraly Úkimettiń baspasóz qyzmeti habarlady.
Іs-sharaǵa qatysýshylardy quttyqtaǵan Ermek Kósherbaev bul bastamanyń jastar áleýetin arttyrýdaǵy mańyzdylyǵyn atap ótti.
— 30 jyl ishinde bul qozǵalys myńdaǵan qazaqstandyq jastardy biriktirip, olardyń kóshbasshylyq qabiletterin ashýǵa, kásipkerlik áleýetin júzege asyrýǵa múmkindik berdi. Memleket ENACTUS qozǵalysyn jastardyń múmkindikterin ashýǵa, batyl ıdeıalaryn júzege asyrýǵa jáne kásibı mansabyn sátti bastaýyna jaǵdaı jasaýǵa baǵyttalǵan bastama retinde qoldaıdy. Sizder — jańa býyn ókilderi, elimizdegi ınnovatsııalardyń qozǵaýshy kúshi bolyp, tabysty startaptar quryp, elimizdiń turaqty damýyn qamtamasyz etesizder, — dedi Premer-mınıstrdiń orynbasary.
ENACTUS Kazakhstan National Expo 2025 jeńimpazdary elimizdiń atynan Taılandta ótetin ENACTUS World Cup 2025 álemdik stýdenttik kásipkerlik jobalar chempıonatyna qatysý múmkindigine ıe bolady. Bul baıqaýǵa 35 eldiń komandalary jınalady.
— Bizdiń elimiz álemde birinshi bolyp dástúrli stýdenttik baǵdarlamamen qatar ENACTUS mektep baǵdarlamasyn ázirleýge kiristi. ENACTUS, bıznes jáne memleket arasyndaǵy tıimdi yntymaqtastyqtyń mańyzdylyǵyn atap ótkim keledi. Mundaı yntymaqtastyq tek shaǵyn bıznesti qoldaý salasynda ǵana emes, sonymen qatar jahandyq maqsattarda da bolashaǵy zor bolyp sanalady. Bul barlyq taraptarǵa naqty paıda ákeletin baǵyt, — dedi «Atameken» QR UKP tóralqa tóraǵasy, ENACTUS KAZAKHSTAN dırektorlar keńesiniń tóraǵasy Raıymbek Batalov.
Halyqaralyq ENACTUS baǵdarlamasy 50 jyl boıy álemniń 35 elinde stýdenttik kásipkerlikti damytýda. Jyl saıyn bul baǵdarlamaǵa 1 800 ýnıversıtetten 72 000-nan astam jastar qatysady. Osy ýaqytqa deıin ENACTUS aıasynda 4 000-nan astam joba júzege asyrylǵan.