Jańa býyn mamandary zamanaýı avıatsııanyń syn-qaterlerine daıyn bolýy tıis — Lastaev
ASTANA. KAZINFORM — Almatyda avıatsııalyq oqytý jáne adamı resýrstardy josparlaý boıynsha IKAO aımaqtyq semınary ótip jatyr.
IKAO EUR/NAT aımaqtyq dırektory Nıkolas Rallo semınardyń ashylýy kezinde is-sharanyń negizgi maqsattarynyń biri sala kóshbasshylary, oqytýshylar jáne bolashaq mamandar arasynda kásibı baılanys ornatý ekenin atap ótti.
— Ortalyq Azııany qosa alǵanda, úkimet, azamattyq avıatsııa organdary, ónerkásippen jáne akademııalyq ortanyń ókilderimen kezdeskenimde men mańyzdy pikirler estidim. Bul pikirtalastar avıatsııa salasyndaǵy kadrlyq resýrstar máselelerin birlesip, yntymaqtastyq jáne ortaq mindetteme arqyly sheshýimiz kerek degen senimimdi nyǵaıtty, — dedi ol.
Al Kólik vıtse-mınıstri Talǵat Lastaev avıatsııalyq bilim berý júıesin damytý men bilikti mamandardy daıarlaý salanyń turaqty ósýiniń negizgi sharty ekenine nazar aýdartty.
— Búginde bilim berý baǵdarlamalary men eńbek naryǵynyń qajettilikteri arasyndaǵy tyǵyz baılanysty qamtamasyz etý erekshe mańyzdy. Jańa býyn mamandary zamanaýı avıatsııanyń syn-qaterlerine daıyn bolyp, ushý qaýipsizdigi men tıimdiligin arttyrýǵa baǵyttalǵan ınnovatsııalyq sheshimderdi engizýge qabiletti bolýy tıis, — dedi vıtse-mınıstr.
Kólik mınıstrligi Azamattyq avıatsııa komıtetiniń tóraǵasy Saltanat Tompıeva baıandamasynda bıyl 9 aıdaǵy salanyń ósim kórsetkishterine toqtaldy. Ótken jyldyń sáıkes kezeńimen salystyrǵanda jolaýshylar tasymaly 7,2%-ǵa artty, al sońǵy úsh jylda áýe kemeleri parki shamamen 15%-ǵa ósti. 2030 jylǵa deıin bul kórsetkishti taǵy 45%-ǵa arttyrý josparlanyp otyr.
— Ónerkásiptiń qarqyndy damýymen avıatsııa salasynda kadrlarǵa degen qajettilik artyp keledi. Osyǵan baılanysty biz IKAO-nyń, sonyń ishinde NGAP bastamalarynyń mańyzyna erekshe nazar aýdaramyz. Ásirese jastar arasynda kásibı baǵdar berý jáne avıatsııa mamandyqtaryn nasıhattaý jumystaryna aıryqsha kóńil bólinýde, — dep atap ótti Saltanat Tompıeva.
Eki kúndik semınar spıkerleriniń qatarynda Eýropalyq biliktilikti arttyrý ortalyǵynyń (JAA TO) bas dırektory Paýla V. de Almeıda; Eurocontrol áýe keńistigi, júıeleri jáne protsedýralary jónindegi atqarýshy menedjer Mılena Boýman; GATE avıatsııalyq oqytý bas dırektory Dırh ıAns; ENAC vıtse-prezıdenti Nıkolıa Kazalıs jáne basqalar bar.
IKAO (EUR/NAT) Avıatsııalyq oqytý jáne kadrlyq resýrstardy josparlaý boıynsha aımaqtyq semınaryna Germanııa, Danııa, Latvııa, Portýgalııa, Reseı, Sıngapýr, Túrkııa, Ózbekstan, Chehııa, Shvetsııa, Ońtústik Koreıa jáne basqa da elderden halyqaralyq uıymdardyń, memlekettik organdardyń, avıatsııa salasynyń jáne oqý ortalyqtarynyń ókilderi jınaldy.
Aıta ketelik Qazaqstan IKAO Assambleıasynda 33 avıatsııalyq bastamany alǵash ret usynǵan edi.