Jańa bosanǵan áıelder qandaı qyzmetterdi SMS arqyly ala alady
«Azamattarǵa arnalǵan úkimet» iske qosqan pılottyq joba boıynsha, jańa týǵan sábıdi tirkeý, járdemaqyny rásimdeý jáne balany balabaqsha kezegine turǵyzý jumystaryn SMS-habarlama arqyly júzege asyrý jumysynyń aıasy keńeıe tústi. Búgingi tańda balany tirkeý boıynsha ótinim memlekettik organdardyń aqparattyq júıesiniń ıntegratsııasynyń arqasynda avtomatty túrde túsedi. Sábı ómir esigin ashqannan keıin ata-anasyna birden SMS-habarlama joldanyp, balany tirkeý boıynsha memlekettik qyzmetti alý usynylady. Osylaısha, adamdar «Azamattarǵa arnalǵan úkimet» memlekettik korporatsııasynyń keńsesine barmaı-aq balanyń týý týraly kýáligin alady, bosaný boıynsha járdemaqy alýǵa shot nómirin jibere alady, sondaı-aq balabaqshaǵa kezekke turady», - dep jazdy departament dırektory Feısbýktegi paraqshasyna.
Murat Jumanbaıdyń jazýynsha, analarǵa zamanaýı ádispen qyzmet kórsetý amaly munymen shektelmeıdi.
«Premer-Mınıstrdiń orynbasary A.Jumaǵalıevtiń tóraǵalyǵymen ótken vedomstvoaralyq komıssııanyń sońǵy otyrysynda memlekettik korporatsııa kórsetetin belsendi qyzmettiń aıasyn keńeıtý týraly sheshim qabyldanǵan bolatyn. Naqtyraq aıtqanda, bala týý týraly tirkeýden ótkennen keıin, ony sondaı-aq meken-jaı boıynsha tirkeý týraly usynys jazylǵan SMS joldap otyrý sheshildi. Demek, budan bylaı qyzmet alýshy balany qaı meken-jaıǵa tirkeıtini týraly SMS-pen jazyp jiberse boldy. Málimetterdiń rastyǵy júıede tekserilip, baspana ıesiniń ruqsaty alynǵannan keıin náreste kórsetilgen meken-jaı boıynsha tirkeledi», - deıdi ol.
Bul qyzmetti alý úshin azamattardyń mobıldik bazasyna tirkelý qajet. Ol úshin Egov portalyndaǵy jeke kabınet kirip, JSB (IIN) nómirin uıaly telefonnyń nómirine baılanystyrý kerek nemese Halyqqa qyzmet kórsetý ortalyǵyna júginýge bolady.
Murat Jumanbaıdyń habarlaýynsha, ilki joba iske qosylǵaly beri 18 myń anaǵa SMS-habarlama arqyly quttyqtaý joldanǵan. Quttyqtaýmen birge jas analarǵa qyzmetti SMS-habarlama arqyly alý múmkindigi usynylǵan. 7 myńǵa jýyq ana belsendi qyzmetti alýǵa kelisimin bergen. Qazirgi ýaqytta 2 myń balanyń ata-anasyna SMS-habarlama arqyly sábıiniń týý týraly kýálikteri berilip, 777 sábı balabaqshaǵa kezekke turǵyzyldy.