Jańa bıznes-ıdeıalarǵa arnalǵan granttar kimderge beriledi

ASTANA. QazAqparat - Memlekettik granttar jańa bıznesti ashqan nemese jolǵa qoıýdy kózdegen tulǵalarǵa óteýsiz jáne qaıtarymsyz negizde beriledi, dep xabarlaıdy QazAqparat Astana ákimdiginiń saıtyna silteme jasap.

Ónimdi jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan «Eńbek» memlekettik baǵdarlamasynyń birinshi baǵyty sheńberinde oqytýdy aıaqtaǵan jáne budan buryn basqa memlekettik baǵdarlamalar sheńberinde qarjylaı qoldaý almaǵan baǵdarlamaǵa qatysýshylar, sondaı-aq qonys aýdarýshylar men oralmandar memlekettik granttardy alýǵa úmitkerler bolyp tabylady.

Grant mólsheri: 100 AEK-ke deıin. Memlekettik grant kásipkerlerdiń qajetti múkámmaldy, eńbek quraldaryn, tehnologııalyq jabdyqty, janýarlardy, maldy, qustardy satyp alýy úshin beriledi. 2019 jyly jańa bıznes-ıdeıalardy ashýǵa beriletin memlekettik grant alýshylar sany 50-den 200-ge deıin artqan bolatyn.