Jańa bıznes-ıdeıalardy iske asyrýǵa arnalǵan granttarǵa ótinim qabyldanady
ASTANA. KAZINFORM — Business.enbek.kz portalynda 2025 jylǵy 20 qazannan bastap jańa bıznes-ıdeıalardy iske asyrýǵa arnalǵan granttarǵa ótinim qabyldaý bastalady, dep habarlaıdy Eńbekmıniniń baspasóz qyzmeti.
— 2025 jylǵy 20 qazannan bastap Business.enbek.kz portalynda (budan ári — Portal) jańa bıznes-ıdeıalardy iske asyrý úshin granttar alýǵa ótinimderdi qabyldaý bastalady. Únemdelgen qarajat esebinen barlyǵy 9 óńirde 270 grant berý josparlanyp otyr: Abaı, Ulytaý, Aqmola, Shyǵys Qazaqstan, Qyzylorda, Pavlodar, Soltústik Qazaqstan, Túrkistan oblystary men Shymkent qalasy, — delingen mınıstrlik taratqan aqparatta.
Granttar qaıtarymsyz negizde beriledi, nysanaly maqsaty jańa bıznesti bastaý jáne damytý bolyp sanalady.
Granttyń mólsheri 400 AEK-ti (1 572 800 tenge) quraıdy. Ár qatysýshy ony tek bir ret ala alady.
Grant qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etýge múmkindik beredi.
Ótinim berý úshin qajet:
— Portalda tirkelý;
— grant alý sharttaryna sáıkestigine tekserýden ótý;
— bıznes-jospar úlgisin júktep alyp, ony toltyrý jáne portalǵa engizý;
— ótinish nysanyn toltyrý jáne ETsQ kiltimen qol qoıý.
Internetke nemese kompıýterge qoljetimdilik bolmaǵan jaǵdaıda, mansap ortalyqtarynyń ózine-ózi qyzmet kórsetý aımaqtarynda, halyqqa qyzmet kórsetý ortalyqtarynda ótinim berýge bolady.
Grant alý úshin birqatar shartty saqtaý qajet.
Grant alýǵa:
— tirkelgen jumyssyzdar;
— jeke kásipkerler (tirkeý merzimi 3 jylǵa deıin) úmitker bola alady.
Bul rette úmitker tómendegi áleýmettik sanattardyń birinen bolý kerek:
— múgedektigi bar adamdar;
— qoldanystaǵy «Qandas» mártebesi bar adamdar;
— óńiraralyq qonys aýdarýshylar
— az qamtylǵan otbasy músheleri;
— kópbalaly otbasy múshesi (jubaıy/zaıyby);
— múgedektigi bar balany tárbıelep otyrǵan adam (jubaıy/zaıyby);
— asyraýshysynan aıyrylý boıynsha járdemaqy alýshylar.
Úmitkerdiń «Bastaý Bıznes» jobasy boıynsha kásipkerlik negizderine oqyǵandyǵy týraly 3 jyldan aspaıtyn merzimde berilgen sertıfıkaty bolýy tıis.
— Grantty qajetti qural-saımandardy, eńbek quraldaryn, tehnologııalyq jabdyqtardy, maldardy, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alý aqysyn tóleýge alýǵa bolady. Granttar tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aktsızdeletin ónimder óndirýge berilmeıdi. Granttardy Eńbek mobıldiligi ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi, — dep túsindirdi Eńbekmıni.
Úmitkerler óz bıznes-jobasyn komıssııa otyrystarynda tanystyrady. Bul rette komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı ólshemsharttar boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komıssııalyq túrde jáne úmitkerlerdiń bıznes-jobalarynyń pysyqtalýyn baǵalaýdyń naqty ólshemsharttary negizinde qabyldanady.
Komıssııa sheshimi úmitkerdiń Portaldaǵy jeke kabınetine jiberiledi. Komıssııanyń oń sheshimi bolǵan jaǵdaıda úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi. Munyń bári Eńbek mobıldiligi ortalyqtary men onyń fılıaldaryna (mansap ortalyqtaryna) barmaı-aq, elektrondyq formatta jasalady.
Budan buryn Úkimet otyrysynda Oljas Bektenov áleýmettik medıtsınalyq saqtandyrý qorynyń bıznes-protsesterin jańǵyrtý baıaý júrip jatqanyn alǵa tartyp, synǵa alǵan edi.