Jańa bilim berý júıesi: tıimdi tusy
ASTANA. QazAqparat - Bıyldan bastap Qazaqstan Skaýt qozǵalysy balalar men jastarǵa arnalǵan beıresmı bilim berý baǵdarlamasyn ázirleýge kiristi.
Bul erekshe baǵdarlama, óıtkeni oqytý - kópultty elimizdiń halyqtyq, mádenı jáne rýhanı qundylyqtary negizinde júrgiziledi. Ol otandyq jáne sheteldik úzdik tájirıbelerdi eskeredi dep kútilýde.
Osyǵan oraı skaýttar elimizdiń búgini men erteńine beı-jaı qaramaıtyn barlyq azamattardy jobaǵa úles qosýǵa shaqyrdy. Skaýttar baǵdarlamany ázirleýde barsha qazaqstandyqtardyń usynystaryn eskermek. Bastysy, ol usynystar balalardyń kúndelikti sabaqtardaǵydaı emes, erkin ári qyzyq túrde damýyna sep bolsa, bolǵany.
Jalpy, skaýtıng - balalarǵa túrli oıyndar men qyzyqty sabaqtar arqyly orta mektepten de mol málimet, zor bilim men daǵdy bere alatyn bilim júıesi. Ony beıresmı bilim berý júıesi dep ataıdy. Skaýttar sol arqyly barlyq nárseni úırenedi. Jazda - tabıǵat aıasynda tirshilik etýdiń qyr-syryn úırense (otqa as pisiredi, qos qurady, palatkada uıyqtap, otyn jınaıdy, sýda júzedi, túrli komandyq oıyndar oınaıdy, aǵashqa órmeleıdi t.b.), qysta - týrızm boıynsha jarystarǵa, kvesterge qatysyp, túrli aktsııalar ótkizedi. Skaýt bolý úshin jas ereksheligi mańyzdy emes. Qysqasha aıtqanda, bul júıe balalarǵa jeke tulǵa retinde damýdyń jolyn aıqyndap bermek.
Beıresmı bilim berýdiń bul túrin Ulybrıtanııa, Úndistan, AQSh, Kanada, Germanııa, Japonııa, Indonezııa, Malaızııa, Shvetsııa, Fınlıandııa, Gonkong, Ýkraına, Armenııa, Reseı, Ázirbaıjan jáne basqa da kóptegen elder zańmen bekitip, jemisin kórip otyr. Qazaqstan skaýt qozǵalysy uıymynyń prezıdenti Ildar Katenovtiń aıtýynsha, skaýtıng beıresmı bilim berý júıesi eki tujyrymdamaǵa súıenedi. Olar - ózine ózi bilim berý jáne «ishki bilim berý» tujyrymdamalary. ıAǵnı, balanyń ustazy - negizinen onyń ózi bolmaq.
«Biz bul baǵdarlamany 2016 jyly mektepterde pılottyq joba retinde engize bastaımyz. Al baǵdarlamany 2017 jyly tolyq aıaqtaýdy josparlap otyrmyz. Jobany júzege asyrý qosymsha qarjyny qajet etpeıdi. Óıtkeni negizinen eriktilerdiń kómegimen júzege asyrylady. Mekteptegi oqytý júıesi bilimge negizdelse, skaýttyq júıe - qundylyqtarǵa súıenedi. Sondyqtan da tıimdi. Ol dástúrli bilim berý júıesiniń balamasy emes, soǵan qosymsha. Sondaı-aq, bilim alýshylardyń jas ereksheligi de eskeriledi», - deıdi Ildar Katenov.
Búginde skaýttyq qozǵalysty QR Parlamenti, jergilikti basqarý organdary, QR bilim jáne ǵylym mınıstrligi, QR Tuńǵysh Prezıdentiniń kitaphanasy, mektepter men balalar shyǵarmashylyq úıleri, qoǵamdyq birlestikter, balalardy damytý jekemenshik ortalyqtary men jalpy bastamashyl ata-analar qoldap otyr.
Álem boıynsha 50 mıllıonnan astam adam Skaýt qozǵalysynyń quramynda eken. Álemniń 169 elinde qanat jaıǵan beldi qozǵalystyń ustanymy - «árqashan daıyn bol!». Skaýttar uıymy jańa qazaqstandyq patrıotızmdi qalyptastyrýǵa, jastar arasynda sýıtsıd pen qylmysty azaıtýǵa, ultaralyq kelisim men turaqtylyqty damytýǵa, eńbeksúıgishtik pen zańdy qurmetteýdi úıretýge arnalǵan túrli sabaqtardy únemi ótkizip turady. Bul uıym azamattyq qoǵam qalyptastyrý men elimizdiń bolashaq betke ustar azamattaryn tárbıeleý jáne daıyndaýǵa qyzmet etetin jańa bilim berý ádistemelerin turaqty túrde engizedi. Al Qazaqstanda bul uıym 1989 jyly quryldy. Búginde ol balalar men jastarǵa arnalǵan respýblıkalyq, qoǵamdyq, erikti, táýelsiz, bısaıası, tárbıelik uıym.
