Jańa basylymnyń kezekti sany jaryq kórdi
ASTANA. Qazannyń 30-y. QazAqparat /Aıdyn Báımen/ - «Qazaq almanaǵynyń» úshinshi sany jaryqqa shyqty. 240 betten turatyn bul kólemdi basylymdy Memlekettik tildi damytý qory shyǵaryp otyr,
dep habarlaıdy QazAqparat.
Aıta ketý kerek, «Qazaq almanaǵy» ústimizdegi jyldyń mamyr aıynan bastap jaryq kórip keledi. Eki aıda bir ret shyǵady. Memlekettik tildi damytý qorynyń dırektory, osy almanahtyń Bas redaktory Berik Ábdiǵalıev. Bul basylym halqymyzdyń armany men muńyn, oıy men sózin, ıdeıasy men maqsatyn, kózqarasy men ustanǵan saıasatyn jeke-jeke aıdarlar boıynsha berýdi jolǵa qoıyp, dástúrge aınaldyrǵan.
«Qazaq almanaǵynyń» osy sanynda ómirden ozǵan Ǵalymjan Muqanovtyń «Ultshyldyq pen uıatsyzdyq: qater qaı tustan» degen zerdeli maqalasyn jarııalaǵan. Sol sekildi marqum Bolathan Taıjannyń «Ulttyń kúretamyry. Derbestik alǵan elderdiń til saıasaty týraly» atty kólemdi oı tolǵamy berilgen.
Osy sanda Hangeldi Ábjanovtyń «Ulttyq ıdeıa - qazaq muraty» dep atalatyn, Jumash Kenebaıdyń «Búgingi qazaq kim?» degen, Sábıt Shildebaıdyń «Bilek bar, bilik joq» atty, Qaragóz Simádilovanyń «Qazaq qazaq bolǵaly» taqyrybyndaǵy týyndylar oqyrman nazaryna usynylǵan. Maqalalardyń taqyryby aıtyp turǵanyndaı, qalamgerler ulttyq máselege qatysty utymdy oı, paıymdy pikir bildirgen. Qazaq halqynyń búgini men keleshegi jaıly oı túıedi.
Sondaı-aq almanahtyń úshinshi sanynda «Bılikke ulttyq máselege qatysty pikir aıtýdan demokratııa týraly oppozıtsııalyq kózqarasta sóz aıtý jeńilirek» degen taqyryppen Erlan Qarınniń suhbaty jaryq kórgen. Suhbatty «Qazaq almanaǵynyń» shef-redaktory Erenǵaıyp Qýataıuly júrgizgen. Bul suhbattyń da ón boıynda keleli oılar órilgen.
Bul basylym orys tilinde de materıaldar jarııalaǵan. Atap aıtqanda, almanahtan Ýálıhan Tóleshovtiń jıyrma birinshi ǵasyrdaǵy qazaq ulttyq ıdeologııasynyń prıntsıpteri týraly, Qanaǵat Júkeshevtiń Memlekettik tildiń tujyrymdamalyq damý ıdeıasy jóninde, Aıdos Sarymnyń Abaı Qunanbaıuly jaıly oı túıgen maqalalaryn oqýǵa bolady. Sonymen qatar Amankeldi Aıtalynyń ulttyq saıasattyń basymdyqtary men maqsaty týraly, Ázimbaı Ǵalıdyń ulttyq ıdeıa men qazaqı ortanyń mindetteri jóninde, Márlen Zımanovtyń qazaq halqynyń qıly taǵdyryna qatysty jáne Ahmet Myrzabolatovtyń qazaq ultynyń ǵajaıyp keleshegi jaıly jazǵan týyndylary orys tilinde jaryq kórip otyr.
