Jańa basshy kelse qyzmetkerler nege aýysady: Almatynyń Densaýlyq basqarmasy esep berdi
ALMATY. QazAqparat - Almatyda qalalyq Qoǵamdyq keńes otyrysynda Densaýlyq saqtaý basqarmasynyń 2017 jylǵy jumys nátıjesi týraly aıtyldy, dep habarlaıdy QazAqparat tilshisi.
Jıyn barysynda keńes músheleri Basqarma basshysy Serikbol Mýsınovke jańa basshynyń kelýimen burynǵy qyzmetkerler nelikten jumystan ketetini týraly saýal qoıdy.
«Ótken jyly qaladaǵy medıtsınalyq mekemelerde túrli sebepterge baılanysty 2 aıda 178 qyzmetker jumystarynan bosatylǵan nemese basqa uıymǵa aýysqan. Osyndaı olqylyqtyń ornyn qalaı toltyrýǵa bolady?», - dedi qoǵamdyq keńes músheleri.
Basqarma basshysy mamandardyń jumystan bosaýyna bir ǵana sebep muryndyq bolǵanyn aıtty.
«Komandalyq prıntsıppen qyzmet aýystyrýǵa tyıym salynady. Bıylǵy kadrlyq taǵaıyndaýlarǵa kelsek, olardyń qarjylyq-sharýashylyq jumystarynda zań buzýshylyqtar bolǵan. Biz belgili bir zań buzýshylyqty kórsek, oǵan nemquraıdy qaraı almaımyz. Biz bıýdjet aqshasyn tıimdi jumsaýymyz kerek», - dedi Serikbol Mýsınov.
Basqarma basshysy sondaı-aq, 20 jastaǵy jas bosanǵan áıeldiń óliminen soń jumystan shyǵarylǵan Perınatologııa jáne balalar kardıohırýrgııasy ortalyǵynyń basshysy Elmıra Jakashevaǵa qatysty pikir aıtty.
«Dáriger mamandyǵy bólek nárse. Biz ol kisini dáriger retinde joǵary baǵalaımyz. Alaıda, medıtsınalyq mekemeni basqarý ol bólek áńgime. Ol úshin basqarýshy maman bolý kerek. Al basqarýshy retinde oǵan taǵar kinámiz kóp. Ol (Elmıra Jakasheva - avt) qarjylyq-sharýashylyq qyzmet kezinde kóp zań buzýshylyqqa jol bergen. Bul máselege qatysty qazir quzyrly organ ókilderi tekserý júrgizip jatyr. Onyń ornyna taǵaıyndalǵan jańa basshy tájirıbesi óte kóp. Bul qyzmettiń talabynan tolyq shyǵady dep oılaımyn», - dedi S.Mýsınov.
Aıta ketý kerek, perzenthana ortalyǵyna jańa basshy retinde bilikti akýsher-gınekolog Ǵanı Bodyqov keldi. Munyń aldynda ol №5 perzenthanany basqaryp kelgen.
Sonymen qatar, Almaty qalalyq onkologııalyq ortalyǵyna da jańa basshy taǵaıyndaldy. Bul qyzmetke Іzmaǵambetov Nursultan keldi. Munyń aldynda ortalyqty Damır Dáýletbaev basqaryp kelgen bolatyn.
№7 qalalyq aýrýhananyń basshylyǵyna Ramazanov Manas Embergenuly keldi. Atalǵan aýrýhananyń basshysy qyzmetin buǵan deıin Marat Shadybaıuly Abdýllaev atqarǵan.
Qazir №5 perzenthananyń basshysy mindetin ýaqytsha Janar Muhametjanova atqaryp otyr.
