Jańa Bas múftı musylmandardy uıytýǵa serpin beredi - Shámshedın Kerim

ALMATY. QazAqparat - Jańa Bas múftı musylmandardy uıytýǵa serpin bererine senemin. Mundaı pikirdi Almatyda Qazaqstan musylmandarynyń YIII quryltaıy kezinde QazAqparat tilshisine «Nur Múbárak» Egıpet ıslam mádenıeti ýnıversıtetiniń prorektory, Quryltaı tóralqasynyń múshesi Shámshedın Kerim aıtty.

Onyń aıtýynsha, mundaı quryltaı basshylyq quramdaǵy ózgerister men jarǵylyq tolyqtyrýlardy kórsetetin mańyzdy jıyn.

«Qazaqstan musylmandary kezekti quryltaıynda jańa múftıdiń kandıdatýrasy qaraldy. Serikbaı qajy Oraz úsh múftıdiń qasynda orynbasar bolyp qyzmet atqarǵan. Qazaqstannyń túkpir-túkpirinen kelgen 312 delegat Erjan qajy Maıamerovtyń usynysyn qabyldap, biraýyzdan daýys berdi. QMDB jarǵysyna ózgerister engizilip, Tóralqa quramy, naıb múftıler  saılandy. Bul Quryltaı basshylyq quramyndaǵy ózgeristerdi jarǵylyq tolyqtyrýlardy kórsetetin serpiliske jeteleıtin jıyn», - dedi Shámshedın Kerim.

Tóralqa múshesi jańa Múftı ózine qoıylǵan mindet-maqsattardy abyroımen atqaratynyna senimdi.

«Zaman talaby ózgerip jatyr. Jańa Bas múftı Qazaqstan Musylmandar dinı  basqarmasyna serpin beredi, musylmandardy uıytady, memlekettik organdarmen baılanysty kúsheıtedi, ımamdardyń birlestikte jumys isteýine uıytqy bolady dep senemiz», - dedi Shámshedın Kerim.

Aıta ketý kerek, búgin Qazaqstan Musylmandary dinı basqarmasyna jańa tóraǵa, Bas Múftı saılandy. Quryltaıǵa qatysýshy 300-den astam delegat Serikbaı qajy Orazulynyń kandıdatýrasyn biraýyzdan qoldady. Jańa Bas múftı 4 jyl, ıaǵnı 2018-2022 jyldar aralyǵynda qyzmet atqaratyn bolady.

Sondaı-aq Bas múftı orynbasarlary laýazymyna Naýryzbaı qajy Taǵanuly, Alaý Ədilbaev, Baýyrjan Esmahanov saılandy.

Osy ýaqytqa deıin Bas múftı qyzmetin atqaryp kelgen Erjan qajy Malǵajyuly óz erkimen qyzmetinen ketti.