Jańa bapker «Barysty» jeńiske jeteleı ala ma

ASTANA. KAZINFORM - Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn elordada Reseıdiń «Sochı» komandasyna qarsy ótkizedi.

Oıyn elorda ýaqytymen 19:00-de bastalady.

Eki komanda buǵan deıin 20 márte kezdesken. Onyń 13-i elordalyq klýbtyń basymdyǵymen aıaqtalsa, qalǵan oıynda reseılik komanda jeńiske jetken. Keıingi úsh kezdesýde qazaqstandyq klýb atalǵan qarsylasynan basym tústi.

Qazaqstandyq komanda budan keıingi eki oıynyn da Astanada ótkizedi. Aldymen 28 qyrkúıekte Reseıdiń «Vıtıaz» (Podolsk) komandasymen kezdesse, 30 qyrkúıekte «Torpedo» (Nıjnıı Novgorod) komandasymen sheberlik baıqasady. 

Eske salsaq, budan buryn «Barys» komandasynyń bas bapkeri Devıd Nemırovskı qyzmetinen ketti. Sondaı-aq onyń ornyna reseılik maman Vıacheslav Býtsaev taǵaıyndaldy.