Jańa baǵyt Qatonqaraǵaı men Buqtyrmaǵa qatynasty jaqsartady
ASTANA. KAZINFORM — Memleket basshysy Qazaqstan halqyna Joldaýynda kólik-logıstıka salasyn damytýǵa, tranzıttik áleýetti arttyrýǵa jáne jol ınfraqurylymyn jańǵyrtýǵa qatysty tapsyrma berdi. Osy tapsyrmalardy oryndaý – Úkimet jumysynyń mańyzdy basymdyqtarynyń biri.
Premer-mınıstrdiń birinshi orynbasary Nurlybek Nálibaev Shyǵys Qazaqstan oblysyna jumys sapary aıasynda Óskemen qalasyndaǵy Sátbaev dańǵyly men Jibek joly kóshesiniń qıylysyndaǵy jańa jol aıyryǵynyń qurylys barysyn kórdi. Mundaǵy qozǵalys qaýipsizdikti eskere otyryp, kezeń-kezeńimen ashylady. Nurlybek Nálibaev jaýapty basshylarǵa qurylys merzimine jáne jumys sapasyna qatysty mindetter júktedi. Esep boıynsha jolaıryqtyń ótkizý qabileti táýligine 85 myńnan 200 myńnan astam kólikke deıin artady.
Úkimet jetekshisiniń orynbasary jumys sapary aıasynda Tereńsaı asýyn aınalyp ótetin joldyń jáne Pıhtovka ózeni arqyly ótetin kópirdiń ashylý saltanatyna qatysty. Bul – óńirdegi kólik qozǵalysynyń qaýipsizdigin arttyratyn, eldi mekender arasyndaǵy baılanysty jaqsartatyn jobalar.
Pıhtovka ózeni ústinen ótetin uzyndyǵy 175 metrlik kópir shatqaldan 45 metr bıikte ornalasqan. Bul – Qazaqstandaǵy eń bıik taýly jerdegi kólik kópiri. Taýdyń qııa betkeıi, tereń shatqaly men kúrdeli tabıǵı jaǵdaıda salynǵan jańa nysan osy aımaqtyń geologııalyq, tabıǵı erekshelikteri esepke alynǵan ınjenerlik sheshimderdi, zamanaýı tehnologııalardy qajet etti. Jeti aralyqtan jáne segiz tirek baǵanadan turatyn kópir qurylysy aınalma joldy salýdaǵy eń jaýapty kezeńniń biri boldy.
Tereńsaı asýy júrgizýshiler úshin kúrdeli ýchaskelerdiń biri edi. Ásirese qys mezgilindegi qarly boran men kóktaıǵaq joldaǵy jaǵdaıdy qıyndatyp, kólik qozǵalysyn ýaqytsha shekteıtin. Asýdyń kúrdeli burylystary men tik órleri de júrgizýshilerden erekshe saqtyqty talap etetin. Endi bul baǵyttaǵy qozǵalys jańa arnaǵa kóshedi. Uzyndyǵy shamamen 12 shaqyrym bolatyn aınalma jol kólikterge qaýipti serpantınge soqpaı, asýdy aınalyp ótýge múmkindik beredi.
- Bul – óńir úshin ǵana emes, elimizdiń kólik ınfraqurylymyn damytý jolyndaǵy da mańyzdy oqıǵa. Memleket basshysy Qasym-Jomart Toqaevtyń tapsyrmasyna sáıkes, Úkimet aldaǵy ýaqytta da elimizdiń kólik ınfraqurylymyn jańǵyrtý jáne óńirlerdiń tranzıttik múmkindikterin keńeıtý jumystaryn jalǵastyrady. Búgingi jańa jol Shyǵys Qazaqstannyń áleýmettik-ekonomıkalyq damýyna serpin berip, óńirdiń týrıstik jáne ınvestıtsııalyq áleýetin arttyra tússin! Barshańyzdy osy aıtýly oqıǵamen shyn júrekten quttyqtaımyn — dedi Nurlybek Nálibaev.
Jańa jol sapar ýaqytyn qysqartyp qana qoımaıdy, eń bastysy, jol-kólik oqıǵalarynyń qaýpin azaıtyp, jolaýshylar men júk tasymalyn turaqtandyrady. Aýa raıy qolaısyz kezde de qozǵalys shektelmeıdi. Óskemen qalasy men Altaı, Úlken Naryn jáne Qatonqaraǵaı aýdandary arasyndaǵy kólik qatynasyn jaqsartady. Bul baǵytpen kúndelikti qatynaıtyn turǵyndar úshin de, júk tasymaldaýshylar men týrıster úshin de joldyń qaýipsiz ári qolaıly bolǵany mańyzdy.
Sonymen qatar jańa baǵyt Shyǵys Qazaqstannyń týrıstik áleýetin damytady. «Buqtyrma» sý qoımasyna, «Qatonqaraǵaı» memlekettik ulttyq tabıǵı parkine jáne «Rahman qaınary» shıpajaıyna baratyn saıahatshylarǵa qolaıly bolady. Osylaısha óńirdiń kórikti jerlerine keletin týrıster aǵyny artady. Jańarǵan jol ınfraqurylymy ekonomıkalyq jáne áleýmettik baılanystardy nyǵaıtyp, shalǵaı eldi mekender turǵyndarynyń jol qatynasyn jaqsartady.
Osy saparda Úkimet jetekshisiniń birinshi orynbasary Óskemen qalasyndaǵy Gematologııa ortalyǵynyń ashylýyna qatysty. Jańa mekeme Shyǵys Qazaqstan, Abaı jáne Pavlodar oblystarynyń turǵyndaryna kúrdeli gematologııalyq aýrýlardy dıagnostıkalaý men emdeýge arnalǵan mamandandyrylǵan jáne joǵary tehnologııalyq medıtsınalyq kómek kórsetedi. Basty maqsat – azamattardyń turǵylyqty jerine qaramastan, sapaly ári ýaqytyly medıtsınalyq kómek alýyna jaǵdaı jasaý.
Aýqymdy jobanyń qurylysy 2020 jyly bastalǵan. Ótken jyly Prezıdent tapsyrmasymen nysan qurylysyn aıaqtaýǵa Arnaýly memlekettik qordan 33,6 mlrd teńge bólindi.
- Memleket basshysynyń tapsyrmasyna sáıkes, medıtsınalyq nysandardy salyp qana qoımaı, olardyń tıimdi jumys isteýine jáne halyqqa naqty paıda ákelýine mán beriledi. Sondyqtan ortalyqtyń bilikti mamandarmen qamtylýy, zamanaýı jabdyqtardyń tıimdi paıdalanylýy jáne medıtsınalyq qyzmet sapasy basty nazarda bolýy tıis. Gematologııa ortalyǵy Shyǵys Qazaqstannyń ǵana emes, kórshiles óńirlerdiń de turǵyndaryna sapaly medıtsınalyq qyzmet kórsetetin mańyzdy nysanǵa aınalady dep senemiz, — dedi Premer-mınıstrdiń birinshi orynbasary.
Ortalyq álemniń jetekshi óndirýshileriniń zamanaýı dıagnostıkalyq jáne emdeý jabdyqtarymen jaraqtandyrylǵan. Joǵary tehnologııalyq jabdyqtar onkogematologııalyq aýrýlar men qan tamyrlary patologııalaryn dál dıagnostıkalaýǵa múmkindik beredi. Dárigerler, ınjenerler men medbıkeler jetekshi respýblıkalyq jáne sheteldik klınıkalarda bilimin jetildirgen.
Negizgi korpýs 148 orynǵa arnalǵan:
24 oryndyq balalar statsıonary;
30 oryndyq somatıkalyq bólim;
25 oryndyq eresekterge arnalǵan gematologııa bólimi;
37 oryndyq kardıologııa;
20 oryndyq kardıohırýrgııa;
12 oryndyq súıek kemigin transplantatsııalaý bólimi.
Keshen quramyna sondaı-aq 24 oryndyq úsh qabatty pansıonat kirdi. Ol ońaltýdan ótip jatqan patsıentterge jáne jaqyndaryna birge ýaqytsha turýǵa arnalǵan. Úsh ǵımarattyń jalpy aýdany 38 myń sharshy metrden asady.
Sapar barysynda Premer-mınıstrdiń birinshi orynbasary óńirdegi strategııalyq mańyzy bar eki energetıkalyq nysan – Óskemen SES-i men Óskemen JEO-syna bardy. Óskemen SES-indegi tórtinshi gıdroagregatty jańǵyrtý jumystaryn kórip, jabdyqtardyń tıimdiligin, senimdi jumysyn qamtamasyz etýge qatysty tapsyrmalar berdi.
Aıta ketelik Qanat Bozymbaev ınfraqurylym jobalaryn teksergeni týraly jazǵan edik.
