Jańa Azamattyq kodekste quqyqtyq jaýaptylyq tetikterin jetildirý usynyldy

ASTANA. KAZINFORM – Qazaqstanda jańa Azamattyq kodeksti ázirleý kezinde zalaldy óteý, turaqsyzdyq aıybyn qoldaný jáne sharttyq mindettemelerdiń buzylýyna baılanysty jaýaptylyq máselelerin keshendi túrde qarastyrý qajet. Bul týraly QR Zańnama jáne quqyqtyq aqparat ınstıtýtynyń aǵa ǵylymı qyzmetkeri, zań ǵylymdarynyń kandıdaty Aıbar Seıdimbek málimdedi.

Kak býdýt razrabatyvat novyı Grajdanskıı kodeks Kazahstana
Foto: Kazinform /JI

Memleket basshysy Qasym-Jomart Toqaev Qazaqstan halqyna arnaǵan Joldaýynda jańa Azamattyq kodeksti ázirleý qajettigin atap ótken bolatyn. Sarapshy bul bastamany qoldap, azamattyq-quqyqtyq jaýaptylyq ınstıtýtyn jetildirý jeke quqyq salasyndaǵy zańnamany jańǵyrtýdyń mańyzdy baǵyttarynyń biri ekenin aıtty.

Onyń pikirinshe, azamattyq-quqyqtyq jaýaptylyqtyń negizgi maqsaty keltirilgen zalaldy óteýmen ǵana shektelmeıdi. Ol buzylǵan múliktik quqyqtardy qalpyna keltirýge, mindettemelerdiń tıisinshe oryndalýyn qamtamasyz etýge jáne azamattyq aınalymǵa qatysýshylardyń adal áreket etýin yntalandyrýǵa baǵyttalýy tıis.

Quqyq qoldaný tájirıbesinde jaýaptylyqtyń týyndaý negizderin aıqyndaý, quqyqqa qaıshy áreket pen keltirilgen zalal arasyndaǵy sebep-saldarlyq baılanysty anyqtaý, sondaı-aq ótelýge jatatyn zalal mólsherin belgileý máseleleri erekshe mańyzǵa ıe.

– Máselen, sharttyq mindettemeler buzylǵan jaǵdaıda mindettemeniń oryndalmaý faktisin anyqtaýmen ǵana shektelýge bolmaıdy. Sonymen birge quqyq buzýshylyqtyń sıpaty, onyń ekinshi tarap úshin týyndatqan saldary jáne zańnamada kózdelgen jaýaptylyqtan bosatý negizderi eskerilýi qajet. Osyǵan baılanysty jańa Kodeksti ázirleý kezinde zalaldy óteý, turaqsyzdyq aıybyn qoldaný, zııandy óteý jáne sharttyq ári sharttan tys jaýaptylyqtyń araqatynasy máselelerin keshendi túrde taldaý oryndy, – dedi Aıbar Seıdimbek.

Sarapshynyń aıtýynsha, azamattyq-quqyqtyq jaýaptylyq ınstıtýtynyń quqyqtyq turǵydan naqty ári júıeli rettelýi azamattyq aınalymǵa qatysýshylardyń quqyqtaryn qorǵaý tıimdiligine tikeleı áser etedi.

Sondyqtan atalǵan ınstıtýtty jetildirý jańa Azamattyq kodeksti ázirleýdiń mańyzdy baǵyttarynyń biri bolýy qajet.

Aıta keteıik, Memleket basshysy Qasym-Jomart Toqaev Qazaqstan halqyna Joldaýynda jańa Azamattyq kodeksti ázirleý qajettigin atap ótken bolatyn. Prezıdenttiń aıtýynsha, qoldanystaǵy azamattyq zańnamany zaman talabyna saı jańartý mańyzdy.