Jańa Azamattyq kodeks zaman talabyna saı bolýy kerek – depýtat
ASTANA. KAZINFORM – Quryltaı depýtaty Únzıla Shapaq jańa Azamattyq kodeksti qabyldaý ýaqyt talaby ekenin aıtty.
– Qazir ómirimizge jańa ekonomıkalyq jáne tsıfrlyq quraldar enip jatyr. Sondyqtan azamattardyń quqyqtaryn qorǵaıtyn tetikter jańarýy qajet. Bul – Prezıdent Joldaýynda kóterilgen mańyzdy máseleniń biri, – dedi spıker Jibek Joly telearnasyndaǵy «Búgin Live» baǵdarlamasynda.
Únzıla Shapaq Azamattyq kodekstiń 1990 jyldardan beri qoldanylyp kele jatqanyn atap ótti. Osyǵan baılanysty jańa zańnama qazirgi jaǵdaıdy eskerip, quqyqtyq qatynastarǵa qatysýshylardyń múddeleri arasyndaǵy tepe-teńdikti qamtamasyz etýi tıis.
– Azamattyq kodeks jalpy jáne erekshe bólimderden turady. Meniń oıymsha, eki bólim de jańadan ázirlenedi. Kodeksti keler jyldyń sońyna deıin qabyldaý josparlanyp otyr, – dedi Únzıla Shapaq.
Sonymen qatar depýtat memlekettik basqarý júıesiniń tıimdiligine toqtalyp, «Halyq únine qulaq asatyn memleket» tujyrymdamasynyń is júzinde júzege asýyna baǵa berý qajettigin aıtty.
– Biz osy ýaqytqa deıin «Halyq únine qulaq asatyn memleket» tujyrymdamasyn júzege asyryp kelemiz. Biraq halyqtyń úni eskerilip júr me? Azamattar kótergen máseleler memlekettik organdardyń jumysynan kórinis taýyp jatyr ma? Osy suraqtarǵa jaýap berý kerek. Sebebi reformalardyń nátıjesi memlekettik organ jumysynyń tıimdiligimen jáne azamattardyń qajettilikteriniń qanshalyqty eskeriletinimen baǵalanýy tıis, – dedi depýtat.
Buǵan deıin Joldaýdaǵy ekonomıkalyq basymdyqtar elge qandaı múmkindik beretinin jazǵan edik.
