Jańa Azamattyq kodeks shart erkindigi men menshik quqyǵyn qorǵaýdy kúsheıtedi
ASTANA.KAZINFORM – Jańa Azamattyq kodeksti ázirleý kezinde menshik quqyǵyn qorǵaý, sharttyq mindettemelerdiń turaqtylyǵy jáne azamattyq aınalymǵa qatysýshylardyń quqyqtaryn qamtamasyz etý máselelerine basymdyq beriledi. Bul týraly QR Ádilet mınıstri Erlan Sársembaev Úkimet otyrysynda málimdedi.
– Jańa Azamattyq kodeksti ázirleýdiń basty baǵyttarynyń biri – bolashaq ekonomıkany quqyqtyq qamtamasyz etý. Bul rette jeke quqyqtyń tıimdiligin dáleldegen ınstıtýttaryn saqtap, jańa ekonomıkalyq qatynastarǵa qatysýshylardyń quqyqtaryn qorǵaýǵa jáne táýekelderdi bólýge múmkindik beretin túsinikti ári mazmundy erejelerdi jetildirý usynylady, – dedi mınıstr.
Onyń aıtýynsha, jańa kodeksti ázirleýdegi ekinshi mańyzdy baǵyt – menshik quqyǵyn qorǵaý jáne sharttyq qatynastardyń turaqtylyǵyn nyǵaıtý.
– Jańa Konstıtýtsııa menshik nysandarynyń barlyq túrlerin teń qorǵaýǵa kepildik berdi. Osy qaǵıdany damytý maqsatynda menshik ıeleriniń kepildikterin kúsheıtý, adal satyp alýshylardyń quqyqtaryn qorǵaý jáne sharttyq mindettemelerdi oryndaýdyń senimdiligin nyǵaıtý usynylady, – dedi Erlan Sársembaev.
Mınıstr shart erkindigin qamtamasyz etý máselesine de toqtaldy. Onyń sózinshe, qoldanystaǵy zańnamada azamattyq aınalymǵa qatysýshylardyń múmkindikterin shekteıtin jáne shart talaptaryn derbes aıqyndaýǵa kedergi keltiretin mindetti normalar bar.
– Sondyqtan jańartylǵan kodeks qoldanýǵa yńǵaıly ári shamadan tys júktemelersiz bolýy tıis, – dep atap ótti ol.
Erlan Sársembaev jańa kodeksti ázirleý qoldanystaǵy zańnamany, sot praktıkasyn jáne jańa konstıtýtsııalyq erejelerdi keshendi taldaýǵa negizdeletinin aıtty. Bul jumysqa depýtattar, ǵylymı qoǵamdastyq, tájirıbeli zańgerler, bıznes ókilderi men sarapshylar tartylmaq.
– Memlekettik organdar Ádilet mınıstrligimen birlesip, Joldaýdan týyndaıtyn tapsyrmalardy taldap, tıisti zań jobalaryn 2027 jylǵa arnalǵan zań jobalaý jumystarynyń josparyna engizýge tıis, – dedi mınıstr.
Onyń pikirinshe, jańa Azamattyq kodeks azamattardyń quqyqtaryn naqty qorǵaýdy qamtamasyz etip, ekonomıkany odan ári damytýǵa qajetti quqyqtyq negiz qalyptastyrýda mańyzdy ról atqarady.
Aıta keteıik, Memleket basshysy jańa Azamattyq kodeks qabyldaý qajet ekenin aıtqan edi.
