Jańa Azamattyq kodeks qazirgi qoǵamnyń qajettilikterine saı bolýy tıis - Erjan Egemberdıev
ASTANA. KAZINFORM - Memleket basshysy Qazaqstan halqyna Joldaýynda jarııalaǵan jańa Azamattyq kodeksti ázirleý jónindegi bastamanyń quqyqtyq memlekettiń odan ári damýy úshin mańyzy zor, deıdi QR Joǵary Sot Keńesi Sot tóreligi akademııasynyń professory, zań ǵylymdarynyń kandıdaty Erjan Egemberdıev.
-Bul bastamany qoldaımyn, óıtkeni azamattyq zańnama qalyptasqan qatynastardy rettep qana qoımaı, qoǵamdyq jáne ekonomıkalyq ómirdegi ózgeristerdi de eskerýge tıis. Sońǵy onjyldyqtarda adamdar arasyndaǵy ózara is-qımyl nysandary, múlikke bılik etý, sharýashylyq qyzmetti júrgizý jáne mámileler jasaý tásilderi aıtarlyqtaı ózgerdi. Bul rette azamattarda ár joly zańgerdiń túsindirýin qajet etpesten, óz quqyqtary men mindetterin baǵdarlaı alý múmkindigi bolýy tıis,-deıdi zańger.
Mysaly, murany resimdeý, jaldaý shartyn jasasý nemese múlikti paıdalanýǵa berý kezinde adam ózi qabyldaǵan sheshimniń qandaı quqyqtyq saldarǵa ákep soǵatynyn jáne zańda qandaı kepildikter kózdelgenin túsinýi mańyzdy.
Sondyqtan jańa Azamattyq kodeks jaı ǵana jańartylǵan quqyqtyq normalar jıyntyǵy emes, kúndelikti qatynastardy retteýdiń túsinikti ári júıeli negizine aınalýy tıis.
Zańnamanyń qoljetimdiligine, quqyqtyq normalardyń ózara úılesimdiligine jáne olardyń is júzinde qoldanylýyna erekshe nazar aýdarý qajet. Bul azamattardyń quqyqtyq saýattylyǵyn arttyrýǵa jáne kóptegen daýlardy týyndamaı turyp-aq boldyrmaýǵa múmkindik beredi.
-Jańa Azamattyq kodeksti sapaly ázirleý qoǵamnyń quqyqtyq mádenıetin nyǵaıtýǵa jáne memleket pen azamattardyń múddelerine saı keletin zamanaýı quqyqtyq ortany qalyptastyrýǵa qosylǵan mańyzdy úles bolatynyna senimdimin,-dedi maman.
Aıta keteıik, Memleket basshysy Qasym-Jomart Toqaev Qazaqstan halqyna Joldaýyn jarııalaý kezinde Quryltaı depýtattary Úkimetpen birlese otyryp, Jańa Azamattyq kodeksti ázirleýge tez arada kiriskeni jón ekenin aıtqan bolatyn.
