Jańa Azamattyq kodeks qabyldaý qajet — Memleket basshysy
ASTANA. KAZINFORM — Quryltaı depýtattary Úkimetpen birlese otyryp, Jańa Azamattyq kodeksti ázirleýge tez arada kiriskeni jón. Bul týraly Qazaqstan halqyna Joldaýyn jarııalaý kezinde Prezıdent Qasym-Jomart málim etti.
— Qazirgi jaǵdaıda ınnovatsııalardy tabysty engizip, ekonomıkanyń básekege qabiletin arttyrý isinde quqyq júıesi aıryqsha ról atqarady. Qoldanystaǵy Azamattyq kodeks ótken ǵasyrdyń 90-shy jyldarynda qabyldandy. Kodeks óziniń tarıhı mıssııasyn tolyq atqaryp shyqty desek, artyq bolmaıdy. Bul qujat naryqtyq ekonomıkanyń negizgi ınstıtýttaryn qurýǵa jol ashty, menshikti qorǵaý qaǵıdatyn bekitti. Buǵan qosa, jańa tarıhı dáýirdegi azamattyq qatynastardyń quqyqtyq negizin qalyptastyrdy. Degenmen qansha jerden sapaly bolsa da, bul Azamattyq kodeks ótpeli kezeńdegi ekonomıka úshin ázirlendi. Sol kezde ozyq tehnologııalardyń zaty túgil, aty da joq bolatyn. Árıne, sońǵy 30 jyl ishinde búkil álem, sonyń ishinde qoǵamymyz túbegeıli ózgerdi, — dedi Qasym-Jomart Toqaev.
Prezıdenttiń aıtýynsha, osynyń bárin eskere otyryp, bolashaqtyń ekonomıkasyna baıyppen kóshýge quqyqtyq negiz bolatyn jańa Azamattyq kodeks qabyldaý qajet.
— Bul kásipkerlerdiń, ınvestorlardyń jáne azamattardyń alańsyz jumys júrgizýi úshin quqyqtyq turaqtylyqty qamtamasyz etýge múmkindik beredi. Quryltaı depýtattary Úkimetpen birlese otyryp, osy mańyzdy qujatty ázirleýge tez arada kiriskeni jón. Quryltaı jańa Azamattyq kodeksti kelesi jyldyń aıaǵyna deıin qabyldasa jón bolar, — dedi Memleket basshysy.
Aıta ketelik Prezıdent mıkro jáne shaǵyn bıznesti tekserýge úsh jylǵa moratorıı engizý máselesin talqylaýdy usynǵan edi.
