Jańa avtomobılder rekordy: tamyzda 18 myńnan asa tehnıka ótti

«Qazaqstannyń Avtokólik Odaǵy» (QAO) bergen málimet boıynsha jazdyń sońǵy aıynda elde 17 200 jeńil avtomobıl men jeńil kommertsııalyq tehnıka, 1031 júk kóligi men avtobýs satylǵan, bul byltyrǵy tamyzben salystyrǵanda 59,5% kóp, dep habarlaıdy QazAqparat.

Jyl basynan beri otandyq dılerler 120 322 avtomobıldiń (+60,5%) kiltin tapsyrypty.

«Jaz shyǵa sala bastalǵan rekord jańartý trendi tamyzda da jalǵasyn taýyp, 18 000 jańa avtomobıl saýdaǵa tústi. Bul 2023 jylǵy ǵana emes, Qazaqstan avtorıteıliniń tarıhynda bolmaǵan kórsetkish. Draıver – brendter tarapynan usynys kóbeıip, toptamaǵa bıýdjettik modelderdiń kóptep qosylýy jáne túrli qarjylyq baǵadarlamalar», - dedi QAO prezıdenti Anar Maqasheva.

Tamyzda Hyundai saýdasy qyzǵan 10 marka arasynda úzdik atandy (ótken jylǵy tamyzben salystyrǵanda 4 624; +107,7%). Chevrolet-tiń 3 363 avtomobıli (-13,4%) ıesin tapty. Úshinshi oryn Kia enshisinde (1 713; +15,4%).

Chery brendi 1 694 (+226,4%) mashına satyp, tórtinshi qatardan kórindi.

Onyń bul jetistigine Tiggo 2 edáýir úles qosty. Qostanaıdan shyqqan Jac-tyń 874 (+199,3%) kóligi ótken. Toyota tamyzda altynshy oryndy qanaǵat tutty (825; -17,3%).

Sońǵy bir-eki aıda Changan men Haval ózara oryn almasyp keledi (768 jáne 752).

Úzdik ondyqqa Jetour (634) men Geely (368) qosyldy.

Eń tanymal modelder kóshin ádettegideı Chevrolet Cobalt (2 030) bastady, odan keıin Hyundai Tucson (1 416) keledi. Úshtikti Kia Sportage (845) túıindedi. Tórtinshi oryn alǵash ret Chery Tiggo 2 (840) krossoverine buıyrdy. Ári qaraı tizimde Hyundai Sonata (520), Jac J7 (471) jáne Chery Tiggo 7 Pro (436) tur.

Segiz aı qorytyndysy boıynsha Hyundai (31 381; +76,4%) oza shaýyp, 28 768 avtomobıli ótken Chevrolet-ni (+40,4%) shań qaptyrdy. Úshinshi qatarǵa jaıǵasqan Kia-nyń 16 384 modeli (+95,3%) ótti. Chery dılerleri 6 977 mashına (+268,8%) satty. Toyota-nyń 5 698 (-11,1%) ónimi ótti.

«2023 jyly naryq sońǵy jyldary jahandy jaılaǵan daǵdarystan eptep shyǵyp, jandana bastady. Degenmen qıyn sátte de Qazaqstannyń avtomombıl salasy óz deńgeıin saqtady, bul komplekt jetkizýshilermen kelisip, balama logıstıka baǵyttaryn qurǵan otandyq kásiporyndar men brend ustaýshylardyń senimi arqasynda júzege asqan is. Munyń bári elge kóptep kólik jetkizýge, naryqqa jańa brendter shyǵarýǵa múmkindik berdi. Osy maýsymda dıstrıbıýtorlar taǵy birneshe kólikti tanystyrýǵa daıyndalyp jatyr, kásiporyndar óndiris kólemin ulǵaıtty. Báseke bolsa, dılerler klıentterge jaqsy qarjy baǵdarlamalaryn usynyp, túrli shara ótkizýge, servıstik qyzmettiń eń jaqsy sharttaryn usynýǵa tyrysady, sondyqtan saýda da qyzady», - dedi QAO prezıdenti Anar Maqasheva.