Jańa aýrýhana, mektep, gaz: Almaty oblysynda turǵyndardy ne kútip tur
QONAEV. KAZINFORM — Almaty oblysynda bilim men medıtsına salasyndaǵy túıtkilder talqylandy.
Qazaqstan Halyq Keńesiniń músheleri Nursultan Orynbasarov, Januzaq Mýsapırov jáne Baqyt Ataıbekov Almaty oblysyna jumys sapary aıasynda Qaskeleń qalasynda bilim jáne áleýmettik sala qyzmetkerlerimen, Shamalǵan aýylynda medıtsına mamandarymen, sondaı-aq Shalqar aýylynda jergilikti turǵyndarmen kezdesip, Memleket basshysynyń Joldaýynda kóterilgen ózekti máselelerdi talqylady.
Qaskeleń qalasynyń Mádenıet úıinde ótken kezdesýde bilim berý salasyn damytý, ınklıýzıvti bilim berýdi jetildirý, erekshe bilim berý qajettilikteri bar balalarǵa qolaıly jaǵdaı jasaý, bilim berý ınfraqurylymyn jańǵyrtý jáne pedagogterdiń jumys júktemesin ońtaılandyrý máseleleri keńinen kóterildi.
— Kezdesý barysynda Keńes múshesi Nursultan Orynbasarov Prezıdent Joldaýynda aıqyndalǵan negizgi basymdyqtarǵa toqtaldy.
Atap aıtqanda, «Halyqtyq qurylys» baǵdarlamasy aıasynda Ulttyq qor qarajaty esebinen aýqymdy ınfraqurylymdyq jobalardy júzege asyrý, jańa mektepter, balalar aýrýhanalary, perzenthanalar men áleýmettik nysandar salý kózdelgen. Sonymen qatar aýyl sharýashylyǵyn qoldaý, fermerlerge uzaq merzimdi ınvestıtsııalyq qarjy bólý, aýyldardy gazdandyrý, sýmen qamtamasyz etý jáne agrologıstıkany damytý máselelerine basymdyq beriletini aıtyldy, — delingen habarlamada.
Sondaı-aq áleýmettik ádildikti qamtamasyz etý, azamattardyń tabysyn arttyrý, dárigerler men pedagogterdiń eńbegin qoldaý jáne memlekettik kómekti shyn máninde muqtaj azamattarǵa baǵyttaý máseleleri de nazardan tys qalǵan joq.
Áleýmettik sala qyzmetkerlerimen ótken basqosýda Keńes músheleri memlekettik áleýmettik qoldaý júıesin jetildirýdiń mańyzyn atap ótti. Memleket basshysy Qasym-Jomart Toqaevtyń «Memlekettik kómek shyn muqtaj adamdarǵa ǵana berilýge tıis» degen ustanymyn negizge ala otyryp, áleýmettik saıasattaǵy árbir reformanyń azamattardyń turmys sapasyna yqpalyn eskerý qajettigi aıtyldy.
Al Shamalǵan aýylynda medıtsına qyzmetkerlerimen ótken kezdesýde Keńes múshesi Januzaq Mýsapırov densaýlyq saqtaý salasyn damytý baǵytyndaǵy mindetterge toqtaldy.
Prezıdent Joldaýynda elimizde segiz zamanaýı perınataldyq ortalyq pen jeti kópbeıindi balalar aýrýhanasyn salý josparlanǵany atap ótildi. Jańa medıtsınalyq nysandardyń qatarynda Qaskeleń qalasynyń da bolýy aýdan turǵyndary úshin mańyzdy jańalyq ekeni aıtyldy. Bul bastama balalarǵa kórsetiletin medıtsınalyq kómektiń qoljetimdiligin arttyryp, óńirdiń densaýlyq saqtaý ınfraqurylymyn damytýǵa múmkindik beredi.
Sonymen qatar alǵashqy medıtsınalyq-sanıtarlyq kómek júıesin jańǵyrtý, medıtsına qyzmetkerlerin qoldaý, medıtsınalyq qyzmet sapasyn arttyrý jáne erekshe qajettilikteri bar balalarǵa arnalǵan ınfraqurylymdy jetildirý máseleleri talqylandy.
Jumys sapary Shalqar aýylynyń turǵyndarymen ótetin kezdesýmen jalǵasty. Basqosý barysynda Joldaýda belgilengen eldiń áleýmettik-ekonomıkalyq damý basymdyqtary, energetıka salasyn jetildirý, halyqtyń ál-aýqatyn arttyrý jáne óńirlerdegi ózekti máselelerdi sheshý joldary sóz boldy.
Osyǵan deıin Astanada Prezıdent Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýyn túsindirýge arnalǵan kezdesýler ótkenin jazǵanbyz.
