Jańa Ata zańdy «halyqtyq Konstıtýtsııa» dep aıtýǵa tolyq negiz bar – Erlan Qarın

ASTANA. KAZINFORM – Zańgerler men til mamandarynyń birlesken jumysynyń nátıjesinde jańa Ata zań mátini oqýǵa jeńil, túsinýge ońaı, quqyqtyq turǵydan naqty qujatqa aınaldy. Bul týraly Memlekettik keńesshi Erlan Qarın Konstıtýtsııalyq komıssııanyń XII otyrysynda aıtty.

Onyń aıtýynsha, jarty jyl boıy qoǵamdyq talqylaý negizinde daıyndalǵan jańa Konstıtýtsııa mátini eki apta buryn jarııalanyp, jan-jaqty qyzý talqylandy. Osy aralyqta azamattardan 10 myńǵa jýyq usynys kelip tústi.

Bul Konstıtýtsııa mátini jan-jaqty talqylaýdan ótkenin, qoǵam tarapynan úlken qyzyǵýshylyq bolǵanyn jáne azamattardyń barynsha belsendi bolǵanyn aıǵaqtaıdy.

– Jańa Konstıtýtsııa jobasy jarııalanǵannan keıin de kelip túsken usynystar negizinde taǵy qosymsha normalar, basqa da redaktsııalyq-stılıstıkalyq ózgerister engizildi. Qoıylǵan suraqtarǵa, aıtylǵan syn-pikirlerge Komıssııa músheleri tarapynan birden jaýap ıa túsinikteme berilip otyrdy. Osylaısha Memleket basshysynyń «Halyq únine qulaq asatyn memleket» qaǵıdaty negizinde qoǵammen keri baılanys ornatylyp, azamattardyń usynys-pikiri múmkindiginshe eskerildi, – dedi Erlan Qarın.

ıAǵnı, kelip túsken barlyq júıeli usynys Konstıtýtsııa mátininde kórinis tapty.

– Sondyqtan ár óńirden, túrli saladan jınalǵan 130 adamnan turatyn Komıssııanyń ashyqtyǵy negizinde, myńdaǵan azamattyń mazmundy usynys-pikirlerin eskere otyryp ázirlengen jańa Konstıtýtsııa jobasyn halyqtyq Konstıtýtsııa dep aıtýǵa tolyq negiz bar. Osylaısha, biz memleket pen qoǵam tutastyǵynyń, birliginiń jańa úlgisin kórsettik. Bolashaqta jańa Konstıtýtsııa azamattardyń qoldaýymen referendýmda qabyldanyp jatsa, bul tek quqyqtyq qujat emes, jalpyulttyq ıdeıa men qundylyqtar turǵysynan qoǵamdyq birliktiń irgetasyna aınalaryna senim bildirgim keledi, – dedi ol.

Memlekettik keńesshi jańa Konstıtýtsııa tuńǵysh ret qazaq tilinde – memlekettik tilde ázirlenip, memlekettik, eldik, ulttyq múdde turǵysynan jazylǵanyn eske saldy. Bul úshin zańgerler men lıngvıst mamandar birlesip, termınologııalyq-redaktsııalyq jumystardy júrgizgen.

– Ekiushty máseleler týyndaǵan jaǵdaıda Ata Zań jobasynyń memlekettik tildegi mátini negizge alyndy. Konstıtýtsııa normalarynyń máni naqtylanyp, túrli sheshimderge negiz bolatyn kemshilikter joıyldy. Bul – kózge kórinbeıtin, biraq óte mańyzdy ári kúrdeli jumystardyń bir bóligi ǵana. Osyndaı jumystardyń nátıjesinde jańa Ata Zańnyń mátini oqýǵa jeńil, túsinýge ońaı, quqyqtyq turǵydan naqty qujatqa aınaldy, – dep túıindedi E.Qarın.

Aıta keteıik, Konstıtýtsııalyq reforma jónindegi komıssııanyń HII otyrysy ótip jatyr.