Jańa Ata zań jobasynda ǵylymdy damytýǵa erekshe mán berilgen — Premer-mınıstr orynbasary

ASTANA. KAZINFORM — Shyǵarmashylyq erkindik te mazmundyq turǵydan naqty aıqyndalady. Bul týraly Konstıtýtsııalyq reforma jónindegi komıssııanyń otyrysynda QR Premer-mınıstriniń orynbasary — Mádenıet jáne aqparat mınıstri Aıda Balaeva málim etti. 

— Jańa Ata zań jobasynda mádenıet, shyǵarmashylyq, ǵylym men bilimdi damytýǵa erekshe mán berilgenin atap ótkim keledi. Jobada tarıhı-mádenı muralardy damytý, tól mádenıetimizdi ulyqtaýǵa qatysty alǵash ret jańa uǵym enip otyr. Atalǵan jańashyldyq ulttyq biregeılikti nyǵaıtýǵa, tarıhı sabaqtastyqty saqtaýǵa jáne ulttyq kod pen mádenı murany keler urpaqqa jetkizýge jol ashady. Memleket mádenı áralýandyqty, ǵylymı izdenisti jáne bilimge negizdelgen damýdy strategııalyq basymdyq retinde aıqyndaıdy. Bul normalar ulttyq mádenıetti saqtaý men jańǵyrtýǵa, ozyq oıly ult qalyptastyrýǵa, ǵylym men ınnovatsııanyń damýyna berik quqyqtyq tirek bolady dep esepteımin, — dedi Aıda Balaeva.

Onyń aıtýynsha, shyǵarmashylyq erkindik te mazmundyq turǵydan naqty aıqyndalady. Ol ǵylymı izdeniske, kórkem oıǵa jáne tehnıkalyq jańashyldyqqa birdeı qatysty.

— Bul rette tehnıkalyq shyǵarmashylyqta, onyń ishinde jasandy ıntellekt múmkindikteri qoldanylǵan jaǵdaıda, sheshýshi ról árdaıym adam aqyl-oıyna tıesili bolyp qala beredi, — dedi Úkimet basshysynyń orynbasary.

Budan buryn habarlanǵandaı, Kazinform agenttiginiń qazaq jáne orys tilindegi Telegram arnasynda Konstıtýtsııalyq komıssııa otyrysynan mátin translıatsııasy bolady.