Jańa Ata zań «Ádiletti Qazaqstan» men «Zań men tártip» qaǵıdatyna kepildik beredi — TúrkPA
ASTANA. KAZINFORM — Búgin elordada Túrki memleketteriniń Parlamenttik Assambleıasy (TúrkPA) Qazaqstanda ótken referendýmǵa qatysty óz baǵasyn berdi.
— QR Syrtqy ister mınıstrliginiń shaqyrýymen TúrkPA mıssııasy 15 naýryzda referendým barysyna baıqaý júrgizdi. Mıssııa quramynda Ázerbaıjan, Qyrǵyzstan, Túrkııa parlamentteriniń ókilderi men saılaý komıssııalarynyń músheleri kirdi. Osy oraıda Astana, Almaty, Túrkistan qalalarynda bolyp, referendým barysyndaǵy uıymdastyrý is-sharalaryna, úgit-nasıhat talaptaryna, quqyqtyq jaǵyna erekshe nazar aýdardyq, — dedi Túrkııa Uly ulttyq jınalysynyń múshesi Osman Mesten tilshiler suraǵyna jaýap bere otyryp.
Onyń sózine qaraǵanda, TúrkPA ókilderi óńirlerdegi memlekettik organdarda, referendým komıssııalarynda kezdesý ótkizdi.
— Qazaqstannyń jańa Konstıtýtsııasynda jańarǵan baptardy tolyq qarap shyqtyq. Qujatta eleýli ózgerister qamtylǵan. Bul rette jańa Ata zańda adam quqyǵyn qorǵaýǵa, sondaı-aq «Ádiletti Qazaqstan» men «Zań men tártip» qaǵıdatyna kepildik beredi, — dedi Túrkııa Uly Ulttyq Jınalysynyń múshesi.
Osman Mestenniń aıtýynsha, mıssııa ókilderi 115 referendým ýchaskede bolǵan. Daýys berý zańnama talaptaryna sáıkes ótti.
— Baıqaýshylar referendým jaqsy deńgeıde uıymdastyrylǵanyn, barlyq rásim ashyq bolǵanyn atap ótti. Bizdiń tarapymyzdan eshqandaı zań buzý deregi anyqtalmady. Sondyqtan referendýmnyń sátti ótýine oraı Qazaqstan Respýblıkasyna qutty bolsyn aıtqym keledi. Elderińiz gúldenip, ál-aýqaty arta bersin, — dedi ol.
Aıta keteıik, 15 naýryzda Qazaqstanda jańa Ata Zańnyń jobasy boıynsha jalpyulttyq referendým ótti.
Bıyl 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalandy.
Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
Respýblıkalyq referendýmda berilgen bıýlletende «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal qoıyldy.
Ortalyq referendým komıssııasynyń málimetine qaraǵanda, Qazaqstanda daýys berý quqyǵy bar azamattardyń 73 paıyzdan astamy óz tańdaýyn jasady.
Birinshi exit poll nátıjesine qaraǵanda, referendýmda halyqtyń 86,7%-y jańa Konstıtýtsııany qoldady.
