Jańa astyq shyqqannan keıin un eksportynyń jaǵdaıy túzeledi - Evgenıı Gan
ASTANA. 13 shilde. QazAqparat /Rýslan Ǵabbasov/ - Jańa astyq shyqqannan keıin un eksportynyń jaǵdaıy túzeledi. Bul týraly búgin Astanada QR Indýstrııa jáne jańa tehnologııalar mınıstrligi janyndaǵy Eksportshylar keńesiniń ІІІ otyrysynda Qazaqstan astyq óńdeýshileri men nan pisirýshileri odaǵynyń prezıdenti Evgenıı Gan málim etti.
«Ótken jyldyń tamyzynan bastap un eksportynyń kólemi tómendep keledi. Atap aıtqanda, bul úderis jańa astyq shyqqanǵa deıin jalǵasýy múmkin»,- dedi E. Gan.
Onyń paıymdaýynsha, aldaǵy jańa astyqtan keıin bul jaǵdaı túzeledi. Alaıda, negizgi úrdister saqtalýy yqtımal.
E. Gannyń sózine qaraǵanda, 2010 jyldaǵy un eksporty kóleminiń búginde 61 paıyzy oryndaldy. Al 39 paıyzǵa jýyq eksporttyń tómendeýi oryn alǵan. «Atap aıtqanda, Aýǵanstan boıynsha eksport aýqymdy kólemde azaıdy. Sonymen qatar Ózbekstan jáne Tájikstan naryqtarynda birshama tómendedi»,-dedi ol. Elimizde óndirilgen unnyń 95 paıyzdan astamy atalǵan elderge eksporttalatyn kórinedi.
«Astyq eksportynda 2009 jyly unnyń úlesi 49 paıyzdy, 2010 jyly 37 paıyzdy qurady. Al qazirgi kezde bul kórsetkish joǵary. Búginde Qazaqstan astyqtyń jartysyn óńdelgen túrde jetkizedi»,-dedi ol.
Atalǵan jıyn barysynda E. Gan gýmanıtarlyq kómek retinde taýardy astyq túrinde emes, kerisinshe un kúıinde jetkizý kerek. Sebebi, bul otandyq dıirmenderdiń jumysyn yntalandyrýǵa múmkindik beredi.
Onyń aıtýynsha, endi jańa naryqtarǵa jol ashý kerek. Bul baǵytta «KAZNEX INVEST» boıynsha qoldaý kórsetýdiń jańa baǵdarlamasy iske qosylýy qajet.
