Jańa astyqtyń 4,9 mln tonnasy elevatorlarǵa jetkizildi
ASTANA. KAZINFORM — Bıyl kókónis jáne kartop saqtaıtyn 15 qoıma paıdalanýǵa beriledi. Bul týraly búgin Úkimet otyrysynda Aýyl sharýashylyǵy vıtse-mınıstri Azat Sultanov aıtty.
— Qazan aıynan bastap 2027 jylǵy egis jumystaryn erte qarjylandyrý tetigi jalǵasady. Bul sharýalarǵa kelesi egis naýqanyna daıyndyqty aldyn ala bastaýǵa múmkindik beredi. Jeńildetilgen lızıng baǵdarlamasy boıynsha jalpy quny 288 mlrd teńgege 8,6 myń aýyl sharýashylyǵy tehnıkasy berildi. Kredıttik resýrstarǵa qoljetimdilikti keńeıtý maqsatynda «Damý» qory arqyly kepildik bazasy jetkiliksiz fermerler úshin qaryz somasynyń 85%-y mólsherinde kepildik berý tetigi qoldanysta, — dedi ol.
Vıtse-mınıstrdiń aıtýynsha, sharýalardy qarjylandyrýdyń jáne bolashaq ónimniń satylymyn qamtamasyz etýdiń qosymsha quraly — forvardyq satyp alý. Bıyl somasy 32 mlrd teńgege 480 myń tonna aýyl sharýashylyǵy ónimine kelisimshart jasaldy.
— Jańa ónim astyǵyn ýaqytyly qabyldaý jáne tıisti deńgeıde saqtaý úshin ákimdiktermen birlesip, elevatorlardyń úzdiksiz jumysy qamtamasyz etilip jatyr. Respýblıka boıynsha astyq saqtaýdyń jalpy syıymdylyǵy 30,5 mln tonnany quraıdy. Onyń ishinde lıtsenzııalanǵan astyq qabyldaý kásiporyndarynda — 13,1 mln tonna, aýyl sharýashylyǵy taýaryn óndirýshilerde — 17,4 mln tonna. Lıtsenzııalanǵan astyq qabyldaý mekemelerine jańa ónimniń 4,9 mln tonna astyǵy kelip tústi, bul ótken jyldyń sáıkes kezeńimen salystyrǵanda 20%-ǵa kóp. Saqtaýǵa túsken jumsaq bıdaı kóleminiń 74%-y joǵary sapaly bıdaıǵa jatady, 20%-y tórtinshi synypqa jatqyzyldy, — dedi ol.
Azat Sultanov astyqtyń saqtalýyn qamtamasyz etýmen qatar, kókónis ónimderin saqtaý ınfraqurylymyn damytýǵa erekshe kóńil bólinetinin aıtty.
— Kókónis qoımalaryn salý jáne jańartý jónindegi keshendi jospar aıasynda aýqymdy jumystar atqaryldy. Nátıjesinde jalpy syıymdylyǵy 746 myń tonna bolatyn 95 saqtaý nysany paıdalanýǵa berildi. Jalpy respýblıka boıynsha syıymdylyǵy 2,5 mln tonnadan asatyn 941 kókónis jáne kartop saqtaý qoımasy jumys isteıdi. Jyl sońyna deıin qýattylyǵy 129 myń tonna bolatyn taǵy 15 saqtaý qoımasy iske qosylatyn bolady. Qabyldanyp jatqan sharalar ónim shyǵynyn azaıtýǵa, saqtaý merzimin uzartýǵa jáne maýsymaralyq kezeńde kókónispen turaqty qamtamasyz etýge múmkindik beredi, — dedi vıtse-mınıstr.
Buǵan deıin bıyl qýańshylyqqa qaramastan astyq túsimi kópjyldyq ortasha kórsetkishten joǵary bolatynyn jazǵan edik.
