«Jańa Almatynyń» damýyna $2 mlrd kóleminde qarjy kerek
«Biz qalanyń ınfraqurylymyn aýqymdy túrde jańartýdy bastaımyz. Qalada ómir súrý sapasyn arttyrý úshin arnaıy uzaq merzimdi jáne qysqa merzimdi josparlar qurylady. Bul ózgerister birinshi kezekte Almaty aglomeratsııasy, shetki aýdandardy damytýǵa qatysty bolady. Jospar boıynsha qaladaǵy eń ózekti sýmen qamtý, jaryqtandyrý, abattandyrý máseleleri birinshi mindet etip qoıylady. Almaty polıortalyq qaǵıdatymen damıtyn qala bolady», - dedi qala ákimi Baqytjan Saǵyntaev Almaty Investment Forum forýmynda.
Onyń aıtýynsha, qalanyń ınfraqurylymyn damytýdyń ózi aldaǵy 5 jylǵa jańa ınvestıtsııa tartýǵa múmkindik beredi.
«Jańa Almaty» josparynyń ózin júzege asyrýǵa 834,5 mlrd teńge qarajat kerek. Qazirgi baǵam boıynsha bul 2 mlrd 155 mln AQSh dollaryna teń», - dedi ákim.
«Almatynyń barlyq basymdyqtary qala ekonomıkasynda qurylymdyq manevr bastaýǵa múmkindik beredi. Bul manevrdiń ereksheligi nede? Qala ekonomıkasynda qazir kóshbasshylyq pozıtsııany kóterme jáne bólshek saýda alyp otyr (32%). Odan keıin qarjylyq operatsııalar (10%), jyljymaıtyn múlikpen qatysty operatsııalar (8,3%). Ónerkásip, qurylys, áleýmettik ekonomıka úlesi az ǵana. Saýdanyń ózi úırenshikti - arhaıkalyq saýda. Elektrondy saýdanyń kólemi 3-5%-dan aspaıdy. Bul qalanyń damýyna tejeýshi faktor bolatyny ras. Qala ekonomıkasynyń álsizdigi de osynda», - dedi Baqytjan Saǵyntaev.
Qurylymdyq manevr eksporttyq múmkinkindikti arttyryp, Almatynyń sheteldik ekonomıkadaǵy úlesin arttyrýdy maqsat tutady.
«Almaty tek osy jaǵdaıda ǵana ekonomıkalyq ósimniń jańa modeline qol jetkize alady. Biz ınvestorlardyń qyzyǵýshylyǵy týyndaıdy degen úmittemiz», - dedi ákim.
