«Jańa Almaty» jospary: Almatynyń yqsham aýdandary ınjenerlik jelilermen qamtamasyz etilýde

ALMATY. QazAQparat - Almatyda «Jańa Almaty» jospary aıasynda «Dýman», «Kólsaı», «Muztaý» yqsham aýdandary ınjenerlik jelilermen qamtamasyz etildi. Bul týraly Óńirlik kommýnıkatsııalar qyzmeti alańynda Almaty qalasynyń Medeý aýdanynyń ákimi Áset Masabaev málimdedi, dep habarlaıdy QazAqparat tilshisi.

Aýdan ákiminiń aıtýynsha, qazirgi tańda «Dýman» yqsham aýdanynda 19 km sýmen jabdyqtaý jáne 25,5 km sý burý jelilerin tóseý jumystary aıaqtaldy. 1505 úı sýmen jabdyqtaý jáne sý burý júıelerine qosylǵan. Barlyǵy 1586 úı qosylatyn bolady.

«Kólsaı» yqsham aýdanynda 15 shaqyrymnan astam ınjenerlik jeliler tartyldy. 68 úı sýǵa qosyldy, 315 úıdi sýmen qamtamasyz etý josparda bar. «Muztaý» yqsham aýdanynda uzyndyǵy 16,7 km sýmen jabdyqtaý jáne sý burýdyń ınjenerlik jelilerin tóseý jumystary júrgizildi.

«Kamenskoe plato» yqsham aýdanynda ınjenerlik jeliler júrgizile bastady. Munda jalpy somasy 300 mln teńgege rezervýar salý jumystary júrgizilip jatyr. Uzyndyǵy 15,5 km jelilerdi salý josparlanýda, iske asyrý merzimi – 2022 jyl.

Aldaǵy jyly S. Nurmaǵambetov, R. Baǵlanova, T. Bıgeldınov, Mańǵystaý, Radlov, Trofımov, Saharıev, Hmelev, Toporkov, Maksımov, Dombyra, Bastyr, Ormanov, Bazarbaev kóshelerinde sý burý jelileriniń qurylysyna JSQ ázirleý josparlanýda. Sondaı-aq, jergilikti organdar Ishtvan Qońyr, Taırov, Kárimbaev-1 jáne Kárimbaev-2 kóshelerinde turatyn «Dýman» yqsham aýdanynyń (81 úı) turǵyndaryn sýǵa qosýdy josparlap otyr.

Sonymen qatar, Kereı-Jánibek handar kóshesindegi №44 bastaýǵa kóteriletin NS-1 (sorǵy stantsııasy) jerasty kózderimen sý tartý ǵımaratynyń qurylysy júrip jatyr. Tátibekov kóshesiniń boıynda parallel kóshelerdi qosa otyryp, káriz jelilerin salý boıynsha JSQ ázirleý josparlanýda.

Sóziniń sońynda Medeý aýdanynyń ákimi «Keńsaı», «Sulýsaı» jáne «4 birlestik» yqsham aýdandarynda 1023 úıdiń gazǵa qosylǵanyn habarlady.