Jańa álipbı boıynsha Ulttyq komıssııanyń quramy qashan bekitiletini belgili boldy

ASTANA. QazAqparat - QR Mádenıet jáne sport mınıstrligi tilderdi damytý jáne qoǵamdyq-saıası jumys komıteti tóraǵasynyń orynbasary Ǵalymjan Meldesh Astanada ótken «Jańa álipbı - jańǵyrý joly» dóńgelek ústelinde jańa álipbıdiń emle-erejesi boıynsha jumys atqaratyn ulttyq komıssııanyń qashan qurylatynyn atady, dep habarlaıdy «QazAqparat» HAA tilshisi.

«Endigi kezekte bul baǵytta Úkimet tarapynan qandaı jumystar júzege asyrylady? Soǵan qysqasha toqtalaıyn. Qazirgi tańda memlekettik tildi latyn grafıkasyndaǵy álipbıge kóshirý jónindegi jumysshy toby jumys atqaryp jatyr. Ol jumysshy tobyn Erbolat Dosaev basqaryp otyr. Buǵan beı-jaı qarap otyrǵan eshkim joq. Búkil memlekettik organdar túgel qatysýda. Negizgi úılestirýshi - Mádenıet jáne sport mınıstrligi», - deıdi Ǵalymjan Meldesh.
 

Onyń aıtýynsha, jańa álipbıge kóshýdiń kezeń-kezeń boıynsha alǵysharttary jasalǵan. Naqtyraq aıtqanda, úsh kezeń boıynsha: 2018-2020 jyldarǵa normatıvtik ulttyq bazany jetildirý jóninde is-sharalar, ekinshi kezeńdegi 2021-2023 jyldar aralyǵynda ınfraqurylymdy jasaý jónindegi sharalardy iske asyrý jáne 2024-2025 jyldary uıymdastyrýshylyq jumystardy júzege asyrý josparlanyp otyr.
 

«Bulardy naqty qatyp qalǵan kezeń dep aıtý áli erte. Óıtkeni, 14 qarasha nemese 16 qarasha kúni taǵy da jumys tobynyń kezekti otyrysy ótip, biz úkimet janynan latyn grafıkasyna kóshý jónindegi ulttyq komıssııanyń quramy bekitiledi. Ol komıssııada búkil memlekettik organdardyń ókilderi, laýazymdy tulǵalar, halyqtyń ortasyndaǵy qoǵam qaıratkerleri men blogerler, eldiń bolashaǵyna, álipbıge jany ashıtyn azamattar tegis jınalady», - deıdi Ǵalymjan Meldesh.