Jańa álem chempıony Golovkın - Alvares rematchynyń jeńimpazymen kezdespek
ASTANA. QazAqparat - Meksıkalyq boksshy Haıme Mýngııa (29-0, 25 KO), birinshi orta salmaqta WBO tujyrymy boıynsha álem chempıony ataǵyn amerıkalyq Sadam Álıden (26-2, 14 KO) tartyp alǵan soń aıtýly jekpe-jek ótkizbek bolyp otyr, dep jazady Sports.kz.
Osy jeńisinen soń Mýngııa kez kelgen boksshymen aıqasýǵa ázir ekenin aıtyp, qyrkúıek aıynda ótýi múmkin Gennadıı Golovkın (38-0-1, 34 KO) men Saýl Alvares (49-1-2, 34 KO) rematchynyń jeńimpazymen rıngke shyǵý úshin orta salmaqqa aýysatynyn jetkizdi.
Eske sala keteıik, Mýngııa Golovkınmen 5 mamyrda kezdesýi de múmkin edi. Biraq Nevada shtatynyń Atletıka komıssııasy onyń kandıdatýrasyn mundaı iri jekpe-jekterde jınaǵan tájirıbesi azdyǵyn syltaý etip qaıtarǵan bolatyn. Nátıjesinde Gennadıı amerıkalyq Vanes Martırosıanmen (36-4-1, 21 KO) kezdesip, ekinshi raýndta nokaýtpen jeńdi.
