Jańa aqsha-nesıelik saıasatty tıimdi júzege asyrý maqsatynda Ulttyq banktiń quzyreti jandana túsedi
ASTANA. QazAqparat - Jańa aqsha-nesıelik saıasatty tıimdi júzege asyrý maqsatynda Ulttyq banktiń quzyretin jandandyrý kózdelýde. Búgin Májiliste «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Ulttyq bankiniń qyzmeti máseleleri boıynsha ózgerister men tolyqtyrýlar engizý týraly» zań jobasynyń tusaýkeseri barysynda Ulttyq bank tóraǵasynyń orynbasary Qýat Qojahmetov osylaı málim etti.
UB ókiliniń sózine qaraǵanda, qaryz alýshy jeke tulǵalardyń qaryzynyń ósip ketýin boldyrmaý maqsatynda zań jobasymen bankterge zaemshylar problemasyna qatysty belgili bir merzimdi engizý kózdeledi. Budan bólek, turaqsyzdyq aıyby, aıyppul nemese ósim kóleminiń shekti mólsheri de qarastyrylyp otyr. Sonymen qatar zaem boıynsha tólem jetkiliksiz bolǵan jaǵdaıda qaryzdy jabýdyń kezekteri belgilenedi. Bul rette eń birinshi kezekte negizgi qaryz, ekinshi kezekte kredıt boıynsha syıaqy, sosyn turaqsyzdyq aıyppuly, aıyppul, ósim sekildi kezekter reti qarastyrylyp otyr.
«Zaemshylardyń meılinshe aqparattanýyn qamtamasyz etý maqsatynda jáne kredıtter usynýdyń ashyqtyǵyn qamtý úshin normatıvtik-quqyqtyq aktilerde aıqyndalǵan tizimnen bólek, banktik zaemmen, shaǵyn nesıemen baılanysty túrli komıssııalarǵa tyıym salynady. Sonymen qatar zań jobasymen ekinshi deńgeıli bankterdiń jumys istemeıtin aktıvterimen jumysty jaqsartý baǵytynda qosymsha tetikter men sharttar qurý kózdelgen. Al jańa aqsha-nesıelik saıasatty tıimdi júzege asyrý maqsatynda Ulttyq banktiń quzyretin jandandyrý qarastyrylǵan. Atap aıtqanda, bul sheteldik valıýtamen operatsııalardy júrgizý, bankteraralyq aqsha aýdarymdarynyń qyzmeti, tólem júıesiniń qyzmetin jetildirý, qolma-qol aqsha aýdarymynsyz tólemder jasaý sekildi baǵyttardy qamtıdy», - deıdi Q.Qojahmetov.
