Jańa Ákimshilik kodeks daý-damaıda álsiz tarapty qorǵaıdy - Qanat Mýsın
«Búgin – elimiz úshin tarıhı kún. Sebebi, Ákimshilik rásimdik-protsestik kodeks búginnen bastap kúshine enedi. Osylaısha elimizde jańa sala – ákimshilik ádilet júıesi iske qosylady. Sizder elimizde azamattyq, qylmystyq, ákimshilik quqyq buzýshylyqtar boıynsha sot isin júrgizýdiń 3 túri bar ekenin jaqsy bilesizder. Jańa Kodekstiń qoldanysqa enýimen sot isin júrgizýdiń tórtinshi túri – ákimshilik sottar jumys isteı bastaıdy», - dedi Qanat Mýsın Ortalyq kommýnıkatsııalar qyzmetinde ótken baspasóz máslıhatynda.
Spıker álem elderinde sheneýnikterdi tártipke shaqyratyn arnaıy júıe qurylǵanyn atap ótti.
«Muny ákimshilik ádilet dep ataımyz. Ákimshilik ádilettiń mıssııasy – bılik organdarymen daý-damaıda álsiz tarapty qorǵaý. Mysaly, bireý ákimdiktiń sheshimimen kelispeıdi. Ol qaıda barady? Árıne, sotqa barady. Al, sot ol daýdy osy kúnge deıin Azamattyq protsestik kodekstiń tártibimen qarap keldi. Ol Kodekstiń ereksheligi – birinshiden, eki tarap tepe-teń. Sot protsesi jaryspaly túrde ótedi. Kimniń dáleli myqty, kim sotty barynsha sendiredi, sol daýdy jeńip shyǵady.
Ekinshiden, sol ákimniń sheshimi durys emestigin sot protsesinde aryz ıesiniń ózi dáleldeýi tıis. Al, jaı adam men kásipkerdi qolynda bıligi bar organmen salystyrýǵa bola ma? Árıne, bolmaıdy. Memlekettik organnyń zańgerleri bar, múmkindigi kóp. Sondyqtan ondaı daýlardyń kóbisi qalaı aıaqtalatynyn bárimiz jaqsy bilemiz. Oǵan dálel – statıstıka. Daýlardyń 85% memlekettik organdardyń paıdasyna sheshilip keldi. Árıne, osylaı bolǵan soń sottarǵa, jalpy bılikke jurttyń ókpesi qara qazandaı», - deıdi Q. Mýsın.
Al jańa Kodeks boıynsha daýlar múldem basqa prıntsıptermen qaralady.
«Munda taraptar teń emes. Sot aryz ıesi retinde jeke azamatqa nemese kásipkerge barynsha kómektesedi. Sol ákimdiktiń sheshimi zańdy ma, zańsyz ba, ony endi talapker dáleldemeıdi. Sol sheshimdi qabyldaǵan ákimdiktiń ózi onyń zańdylyǵyn, qajettiligin, negizdiligin dáleldeýi tıis», - dep túsindirdi Qanat Mýsın.
Aıta keteıik, búgin Prezıdent Qasym-Jomart Toqaev qol qoıǵan Qazaqstan Respýblıkasynyń jańa Ákimshilik rásimdik-protsessýaldyq kodeksi kúshine endi.
Odan bólek, QazAqparat Ákimshilik rásimdik-protsestik kodekstiń negizgi normalary týraly habarlaǵan bolatyn.
