Jańa ákim Shymkent turǵyndarynyń jalaqysyn kóterýge kúsh salady

ASTANA. QazAqparat - Shymkent qalasyna respýblıkalyq mártebe berilgennen keıin ákimdik qyzmetkerleri Astana men Almatymen birdeı jalaqy alady. Qala ákimi Ǵabıdolla Ábdirahymov qarapaıym jumysshylardyń jalaqysyn da kóterýge kúsh salmaqshy, dep habarlaıdy QazAqparat tilshisi.

«Buryn Shymkent qalasynyń apparaty oblystyq mańyzy bar qalanyń deńgeıimen jalaqy alyp turdy. Endi, respýblıkalyq mártebe berilgennen keıin ákimdikte jumys isteıtin qyzmetkerlerdiń kategorııalary joǵarylaıdy. Soǵan qaraı jalaqysy da ósetin bolady. Jalaqynyń kólemi Astana men Almatymen birdeı bolady», - dedi Ǵ.Ábdirahymov QazAqparat tilshisine bergen suhbatynda.

Ákimniń aıtýynsha, mártebeniń resmı túrde kóterilgenin árbir qala turǵyny sezinýi kerek.

«Halyq qazirgi ózgeristerdi qysqa ýaqyttyń ishinde kórýi tıis. Sondyqtan men qazir kásipkerlermen sóılesip, óz qyzmetkerleriniń jalaqysyn kóbeıtý men jańa jumys oryndaryn ashý jóninde kelissózder júrgizip jatyrmyn. Olarǵa «sender de jalaqy júıelerińdi qarastyryp, jaqyn arada jumysshylardyń aılyǵyn kóterý máselesin sheshińder» dep aıtyp otyrmyn. Sonymen qatar, bizde úlken qurylys bastalaıyn dep jatyr. Haıvıl, BI Group, Bazıs sııaqty kompanııalar kelip turǵyn úıler salamyz dep otyr. Al salynatyn qurylys kóbeıse, jańa jumys oryndary ashylady. Myqty kompanııalar kelse, standarttar da kóteriledi. Sosyn qurylystyń tóńireginde shaǵyn jáne orta bıznes damıdy dep úmittenip otyrmyz. Meniń oıymsha, bunyń barlyǵy bir jyldyń ishinde qalanyń damýyna úlken serpin beredi. Sonyń bárin qarapaıym halyq sezinetin bolady», - dep atap kórsetti Ǵ.Ábdirahymov.

Foto: i.ytimg.com