Jańa AES-tiń qurylysy qashan bastalady — Sátqalıev jaýaby

ASTANA. KAZINFORM — Atom energetıkasy jónindegi agenttik tóraǵasy Almasadam Sátqalıev jańa AES-tiń ataýyna qatysty pikir aıtty. 

— Onyń ataýyna qatysty tıisti ólshemshartty aıqyndadyq. Bul turǵyda tarıhı ári ımıdjdik mańyzdylyǵy eskeriledi. AES ataýy tarıhı-mádenı murany qamtıdy, — dedi Almasadam Sátqalıev.

Onyń aıtýynsha, AES-tiń qurylysy aıasynda Úlken aýylyndaǵy alańda jobalaý jáne synama alý jumystary bastaldy.

— Standart boıynsha bul jumystar eki jyldan kem emes ýaqyt boıy júzege asyrylady. Jobalaý-smetalyq qujattamaǵa túzetý engiziledi. Osydan keıin onyń bári tıisti memlekettik saraptamadan ótip, qurylysty bastaýǵa ruqsat alýy kerek. Sondyqtan eki jyl ýaqyt kerek. Qazir eki eldiń qarjy mınıstrlikteri (Qazaqstan men Reseı) arasynda memleketaralyq nesıeni alýda besendi kelissóz júrip jatyr, — dedi agenttik basshysy.

Onyń sózine qaraǵanda, jobalaý men qurylysty eskere otyryp, ortasha eseppen 10-12 jylda AES paıdalanýǵa beriledi.

Buǵan deıin habarlanǵandaı, Almaty oblysy Jambyl aýdanynda ornalasqan Úlken aýylynda jaqynda Qazaqstandaǵy alǵashqy atom elektr stantsııasynyń qurylysy jobasy bastaldy.

«Rosatom» mamandary alǵashqy barlaý uńǵymasyn burǵylap, topyraq synamasyn alýǵa kiristi.

Eske salsaq, 5 qyrkúıekte Atom energııasy jónindegi agenttiginde Almaty oblysy Jambyl aýdanynda salynýy josparlanǵan atom elektr stantsııasyna ataý berý boıynsha jalpy halyqtyq konkýrs ótkizý máselelerin qaraǵan jumys tobynyń ekinshi otyrysy ótti. 

Jumys tobynyń músheleri atom elektr stantsııasynyń ataýyn aıqyndaý sheshimi birqatar faktordy eskere otyryp qabyldanatynyn atap ótti. Konkýrstyq komıssııa usynystardy ataýdyń tanymaldylyǵy, tarıhı jáne mádenı mańyzdylyǵy, atom energetıkasynyń ımıdjine sáıkestigi, áýezdiligi, este saqtaýdyń jeńildigi, biregeıligi jáne ózindik ereksheligi sekildi ólshem sharttar boıynsha baǵalaıdy.