«Jańa adamdar» belsendileri & elorda ákimdigi: zańsyz tastalǵan qoqyspen kúres
ASTANA. KAZINFORM — «Jańa adamdar» qozǵalysynyń belsendileri Astanada zańsyz tastalǵan qoqys úıindisin joıýǵa qol jetkizdi.
Bıyl sáýirde «Jańa adamdar» qozǵalysynyń belsendileri Astanadaǵy Uly dala dańǵyly boıynda ornalasqan «Aıva» turǵyn úı kesheniniń janynda qurylys jáne turmys qaldyqtary zańsyz tógilgen qoqys alańyn anyqtady. Qoqysty belgisiz adamdar kún saıyn ákelip tógip otyrǵan, al sol jerdegi jumysshylar qoqysty jaı ǵana topyraqpen aralastyryp kómgen. Saldary ekologııalyq qaýipke alyp keldi.
Jańa adamdar belsendileri júrgizgen tergeý jumystary BAQ pen áleýmettik jelilerde daý týdyrdy. Alaıda belsendiler munymen shektelmeı, jaǵdaıǵa aralasý usynysymen ákimdikke júgindi.
23 sáýirde «AntiTrash Astana» azamattyq naýqany Esil aýdany ákiminiń orynbasary Madııar Jumabaıulymen qoqys úıilgen jerge bardy. Ákimdik ókilderimen birge tazalaý jumystary uıymdastyrylyp, aýmaq pen kóldi keń kólemde tazartý bastaldy. Alǵashynda shamamen 70 000 sharshy metr jer tazartyldy, kamazdar qoqysty alyp ketip jatyr. Jaýapty tulǵalar iske qosyldy, seń qozǵaldy.
— Shynyn aıtqanda, mundaı qoqys alańdary óte kóp. Tek Astanada ǵana emes. Olar ózdiginen paıda bolǵan joq, óıtkeni keıbir el turǵyndary úshin Qazaqstan — jeke jaýapkershilik aımaǵy emes. Eger bárimiz ózgerýdi bastamaı, elge óz úıimizdeı qaramasaq, eshteńe ózgermeıdi. Ádiletti Qazaqstanda ómir súrgimiz kele me? Ol ózdiginen paıda bolmaıdy. El tek biz ózgergende ǵana ózgeredi, — dedi «Jańa adamdar» qozǵalysynyń ókili Baýyrjan Amanov.
Eske salaıyq, jyl basynda Prezıdent «Jańa adamdar» jastar forýmynda sóz sóıledi.
Aıta ketsek, sáýirde elordanyń Esil aýdanynda bir jerge bes ret zańsyz qoqys tastaý faktisi tirkelgeni týraly jazǵan edik.