«Jańa adamdar» ata-ana qamqorlyǵynsyz qalǵan balalarǵa arnalǵan jańa jyldyq aktsııa ótkizdi
ASTANA. KAZINFORM – Astanadaǵy «Alaý» muz aıdynynda Jańa adamdar «Meıirimdi Qazaqstan» bastamasy aıasynda ata-anasynyń qamqorlyǵynsyz qalǵan balalarǵa arnalǵan «Jańa rıtmge qosyl – meıirimdi bol» atty jańa jyldyq áleýmettik aktsııa uıymdastyrdy.
Іs-shara barysynda qamqorlyq, adaldyq jáne azamattyq jaýapkershilik qundylyqtary naqty áreketter arqyly kórinis tapty. Qatysýshylar ár adam ádiletti ári meıirimdi qoǵam qalyptastyrýǵa óz úlesin qosa alatynyn sezindi.
«Meıirimdilik, qamqorlyq jáne tileýlestik – bizdiń ulttyq ereksheligimiz. Biz osy qundylyqtarymyzdy saqtap, óskeleń urpaqtyń boıyna sińirýimiz kerek», – degen bolatyn Memleket basshysy.
Uıym ókilderiniń aıtýynsha, halyqtyń kúshi – birlik pen bir-birine qoldaý kórsetýde. Bıyl «Jańa adamdar» qozǵalysy azamattyq bastamalardy birneshe baǵytta belsendi iske asyrdy. Atap aıtqanda, uzaqqa sozylǵan qurylystar men zańsyz qoqys alańdaryn anyqtap, olarǵa qarsy áreket etti, zań talaptarynyń saqtalýyna jáne zorlyq-zombylyqqa nóldik tózimdilik qaǵıdatyna nazar aýdardy, balalardyń quqyqtaryn qorǵaýǵa atsalysty, qalalyq ortany jaqsartýǵa jáne ekologııa men azamattyq jaýapkershilikti tsıfrlandyrýǵa baǵyttalǵan jobalardy damytty.
Sondaı-aq túrli buzýshylyqtardy tirkep, qoǵam sanasynyń júıeli ózgerýine yqpal etti.
Aktsııa aıasynda balalar men qozǵalys belsendileri birlesken is-sharalarǵa qatysyp, muz aıdynynda syrǵanady, oıyn jáne kreatıvti baǵdarlamalarǵa atsalysty.
Uıymdastyrýshylardyń aıtýynsha, sharanyń basty maqsaty – eldiń bolashaǵy qarapaıym adamı qasıetter men kúndelikti ıgi isterden bastalatynyn kórsetý.
Іs-shara sońynda ár balaǵa «Jańa adamdar» belsendileri ázirlegen jańa jyldyq syılyqtar tabystaldy. Uıym ókilderi «Meıirimdi Qazaqstan» – jaqsylyq pen adaldyq naqty ister arqyly kórinetin, elde bolyp jatqan árbir ózgeris ár azamatqa tikeleı qatysty bolatyn memleket ekenin atap ótti.
Aıta keteıik, Jańa adamdar astanalyq klınıkadaǵy jalǵan anyqtama satý deregin áshkerelegen bolatyn.