Jańa AÁK: Qujatty qysqa merzimde ótkizý mindetti me
Mınıstrliktiń aqparatyna sáıkes, tórt jáne odan kóp balalary bar qazaqstandyqtar memlekettik járdemaqyny taǵaıyndaý úshin qujattardy qysqa merzimde tapsyrýǵa umtylyp, Halyqqa qyzmet kórsetý ortalyqtarynda dúrbeleń týǵyzýda. Al, bul sanattaǵy otbasylarǵa beriletin járdemaqyny rásimdeý merzimi shektelmegen.
«Qazirgi ýaqytta ár kópbalaly otbasy boıynsha is maketterin aldyn ala qalyptastyrý protsesi júrip jatyr. Bul, azamattarǵa yńǵaıly. ıAǵnı, olardyń 2020 jylǵy 1 qańtardan bastap jańa memlekettik járdemaqyny alý múmkindigi bolýy úshin aldyn ala jasalady. Qujattardy qysqa merzimde tapsyrý qajetttigi týraly messendjerlerde taratylyp jatqan aqparat shyndyqqa sáıkes kelmeıdi. Qujattardy qabyldaý úderisi eshqandaı merzimdermen shektelmegen», - dep atap ótti vedomstvodan.
Atap ótilgendeı, qazirgi ýaqytta arnaýly memlekettik járdemaqy alatyn kópbalaly otbasylar, ıaǵnı qarjylaı kómek 2018 jylǵa deıin taǵaıyndalǵandar (otbasyna 10 500 teńge bolatyn) úshin jańa járdemaqyǵa kóshý HQO-ǵa júginbesten, januıada besinshi jáne odan da kóp balanyń dúnıege kelýin eskere otyryp, avtomatty túrde júzege asyrylady. Sonymen qatar, QR Eńbek jáne halyqty áleýmettik qorǵaý mınıstrligi bul járdemaqy birinshi ret taǵaıyndalatyn kópbalaly otbasylarǵa taǵaıyndaýdyń belsendi formatyn qarastyrýda.
Eske salaıyq, búginde Parlamentte 2020 jylǵy 1 qańtardan bastap 4 jáne odan da kóp kámeletke tolmaǵan balalary bar nemese 23 jasqa deıingi kúndizgi oqý bóliminde oqıtyn stýdentteri bar otbasylarǵa memlekettik járdemaqy tóleýdi kózdeıtin Zań jobasy qaralýda. Ol áýlettiń tabysyna qaramastan saralanǵan mólsherde taǵaıyndalady: 4 balaǵa – 42 496 teńge; 5 balaǵa – 53127 teńge; 6 balaǵa – 63 757 teńge; 7 jáne odan kóp balaǵa – 74 388 teńge.
