Jańa 1 000 teńgelik banknotany qabyldamaǵandar jaýapkershilikke tartylady — Ulttyq bank
ASTANA. KAZINFORM — Bıyl 9 mamyrdan bastap Ulttyq banki aınalysqa Uly Jeńistiń 80 jyldyǵyna arnalǵan 1 000 teńgelik mereıtoılyq banknotty shekteýli taralymmen shyǵardy.
Alaıda áleýmettik jelilerde keıbir aıyrbastaý pýnktteri men saýda oryndarynyń jańa kýpıýrany qabyldamaı jatqany týraly aqparat tarady.
Bul rette Ulttyq bank túsinikteme berdi.
— Nomınaly 1 000 teńgelik mereıtoılyq banknota óz qunyna saı Qazaqstan Respýblıkasynyń búkil aýmaǵynda tólemniń barlyq túri boıynsha qabyldanýǵa jatady. Sondaı-aq banktik shotqa salýǵa, Qazaqstan Respýblıkasynyń barlyq bankinde aýdarýǵa jáne usaqtalýǵa mindetti, — dep habarlady Ulttyq bank baspasóz qyzmeti.
Sonymen qatar Ulttyq bank aıyrbastaý pýnktteri men ekinshi deńgeıli bankterdiń qoldanystaǵy banknotalardy qabyldaý mindeti zańmen bekitilgenin eske saldy.
— Aıyrbastaý pýnktteri men bankterdiń aınalysta júrgen banknotalardy qabyldaý mindeti «Valıýtalyq retteý jáne valıýtalyq baqylaý týraly» zańmen jáne Ulttyq banktiń 2019 jylǵy 11 aqpandaǵy № 40 qaýlysymen bekitilgen «Shetel valıýtasymen aıyrbastaý operatsııalaryn uıymdastyrý qaǵıdalarymen» aıqyndalǵan, — delingen resmı túsindirmede.
Ulttyq bank sondaı-aq azamattarǵa aınalystaǵy banknotany qabyldaýdan bas tartqan jaǵdaıda qaıda júginý kerektigin de túsindirdi.
— Eger azamattarǵa aınalystaǵy ulttyq valıýtadaǵy banknotalar men monetalardy tólemge qabyldaýdan, aıyrbastaýdan nemese aýystyrýdan bas tartqan jaǵdaıda, olar Ulttyq banktiń aýmaqtyq fılıaldaryna tıisti ótinishpen júginýge quqyly, — dedi vedomstvodan.
Sonymen qatar vedomstvo banknotany qabyldaýdan bas tartqandarǵa zańmen jaýapkershilik qarastyrylǵanyn eske saldy.
— Ákimshilik quqyq buzýshylyq týraly kodekstiń 206-babynyń úshinshi bóligine sáıkes, aınalysta júrgen jáne tólemniń barlyq túri boıynsha qabyldanýǵa jatatyn ulttyq valıýta banknottary men monetalaryn qabyldaýdan, aıyrbastaýdan nemese aýystyrýdan bas tartqan bankter men ulttyq poshta operatory ákimshilik jaýapkershilikke tartylady, — dep atap ótti Ulttyq bank.
Buǵan deıin Ulttyq bank qoldan jasalǵan ulttyq valıýta banknotalary taraǵanyn eskertken edi.