«Jan-júregim, Astanam!» kórmesinde kishkentaı elordalyq búldirshinderdiń shyǵarmashylyǵy kópshilik nazaryna usynylady
ASTANA. QazAqparat - «Jan-júregim, Astanam!» kórmesinde kishkentaı elordalyq búldirshinderdiń shyǵarmashylyǵy kópshilik nazaryna usynylady. Balalar óz sýretterinde jas astananyń kórkem kelbetin beıneleıtin bolady, dep habarlady astana.gov.kz saıty.
Uıymdastyrýshylardyń josparyna sáıkes, kórmege beıneleý óneri, sándik-qoldanbaly shyǵarmashylyq, zamanaýı dızaın úıirmeleriniń 200 astam tálimgeriniń jumystary qoıylady. Balalar alǵys hattarmen jáne baǵaly syılyqtarmen marapattalady. Shara sońynda sýretter men buıymdar áleýmettik mekemelerge tartý etiledi. Shara balalardyń boıyna rýhanı qundylyqtar men meıirimdilik, otansúıgishtik, belsendilik qasıetterin sińirip, zárý jandarǵa qol ushyn sozýǵa tárbıeleý, ásirese balalar úıi tárbıelenýshilerine qaıyrymdylyq kómek kórsetýge baǵyttalady.
Jany meıirimge toly balalardyń qolynan shyqqan názik te ásem týyndylar qatysýshylarǵa erekshe áser syılaıdy.
Kórme 10 maýsymda saǵat 11.00 jańa Oqýshylar saraıynyń Galereıa alańynda ótedi.
