Jan-jaqty oılastyrylǵan – Sarapshy Úkimettiń baǵaǵa qatysty sheshimi týraly aıtty

ASTANA. KAZINFORM – Úkimettiń halyq pen bıznesti qoldaý sharalary – jan-jaqty oılastyrylǵan jáne der kezinde jasalǵan qadam. Bul týraly ekonomıst Rasýl Rysmambetov Jibek Joly telearnasyna bergen suhbatynda málim etti. 

Onyń aıtýynsha, kásipkerlerge salyq boıynsha kanıkýl berý, benzın baǵasy men kommýnaldyq qyzmet tarıfiniń ósýine tosqaýyl qoıý, jańa ıpotekalyq baǵdarlamalardyń iske qosylýy sııaqty qadamdar jan-jaqty oılastyrylyp, jasalyp otyr.

– Prezıdent Úkimetke salyq salasy men ekonomıkadaǵy ózgeristerge qatysty qandaı da bir ótpeli kezeńdi qamtamasyz etýdi tapsyrdy. Úkimettiń qazir jasaǵany – ary qaraı yryqtandyrý úshin býferlik aımaq qurý. Bul is-sharalar keri sheginýdi bildirmeıdi. Ary qaraı josparlanǵan ilgerileýdiń aldyndaǵy birshama úzilis desek bolady. Sondyqtan artqa sheginýge bolmaıtynyn túsinýimiz kerek, - dedi Rasýl Rysmambetov.

Budan buryn habarlanǵandaı, Prezıdent Qasym-Jomart Toqaev Premer-mınıstr Oljas Bektenovke osy aptanyń sońyna deıin azamattardyń múddesin eskere otyryp, Úkimettiń ekonomıkalyq reformalar baǵdarlamasyn iske asyrý úderisin retteýge qatysty naqty josparlar ázirleýdi tapsyrdy. 

Atap aıtqanda, benzın men tarıf baǵasyna moratorıı engizilip, ıpoteka kólemi ulǵaıady.