Jan túrshigerlik apatqa kináli toı kortejiniń júrgizýshisi 9 jylǵa sottaldy
TARAZ. QazAqparat - Merki aýdandyq sotynda Sypataı aýylyndaǵy trassada bolǵan qaıǵyly oqıǵaǵa aıypty avtomashına júrgizýshisiniń isi boıynsha sot protsesi aıaqtaldy, dep habarlaıdy «QazAqparat» HAA tilshisi Jambyl oblystyq sotynyń baspasóz qyzmetine silteme jasap.
Eske sala ketsek, 14 shildede Merki aýdanynda birneshe avtomobıl soqtyǵysqan bolatyn. «Gelendvagen» júrgizýshisi kortejdi qýyp jetip, asyǵystyqpen úsh mashınany soǵyp ketken. Onyń biri jol-patrýl polıtsııasy batalonynyń qyzmettik kóligi edi. Sol oqıǵada kúshti soqqy alǵan «VAZ-2114» jolaýshylary - eki jasar qyz ben 55 jastaǵy áıel ajal qushty. VAZ júrgizýshisi, 23 jastaǵy jigit aýrýhanada jan tapsyrdy. Taǵy úsh jolaýshy men apattyń sebepshisi bolǵan júrgizýshi aýrýhanaǵa jetkizildi.
Jol apatynda qaza tapqan otbasynyń otaǵasy Aǵapasha Ámirollaev qaıǵyly oqıǵada áıelinen, balasynan jáne nemeresinen aıyryldy. Sottalýshy 27 jastaǵy Nurbolat Sholpanqulov sot otyrysynda Ámirollaevtar otbasynan keshirim suramaq boldy. Alaıda jábirlenýshi oǵan eń qatań jazanyń berilýin talap etti.
Merki aýdandyq sotynyń úkimimen «Gelendvagen» júrgizýshisi QR Qylmystyq kodeksiniń 345-baby, 4-bóligimen («abaısyzda eki nemese odan da kóp adamnyń ólimine ákep soqqan is-áreket») aıypty dep tanylyp, 9 jylǵa bas bostandyǵynan aıyryldy.
Budan tys, ol 7 jylǵa kólik quraldaryn basqarý quqyǵynan aıyryldy. Ol jazany qaýipsizdigi tómen mekemede óteıdi. Sondaı-aq sot Aǵapasha Ámirollaevtyń 100 myń teńge materıaldyq jáne 5 mıllıon teńge moraldyq zııan ótemaqysyn tóleý jónindegi talabyn qanaǵattandyrdy.
Sholpanqulovqa úkim zańdy kúshine engennen keıingi bir aı ishinde jazany óteýdiń erikti merzimi belgilendi. Budan tys, ol sot saraptamasy úshin 265,2 myń teńge tóleýi tıis.
