Jan Kosobýtskıı WBC tıtýly bar 43 jastaǵy amerıkalyqpen jekpe-jek ótkizedi

NUR-SULTAN. QazAqparat – 17 qazanda Germanııanyń Dıýsseldorf qalasynda kásibı boks keshi ótedi. Onda qazaqstandyq aýyr salmaqtaǵy nokaýtshy Jan Kosobýtskıı (14-0, 13 KO) de óner kórsetedi, dep habarlaıdy QazAqparat Sports.kz-ke silteme jasap.

BoxRec.com saıtynyń aqparaty boıynsha 31 jastaǵy Jannyń qarsylasy 43 jastaǵy amerıkalyq Stıv Výkos (12-1, 4 KO). Eki boksshy Kosobýtskııge tıesili aýyr salmaqtaǵy IBO Inter-Continental chempıony ataǵyna talasady.

Aıta keteıik, Výkos WBC (UNSBC) nusqasy boıynsha AQSh chempıony belbeýine ıe, alaıda BoxRec-tegi jekpe-jek profılinde bul ataq kórsetilmegen.

Buǵan deıin Kosobýtskııdiń komandasy basqa amerıkalyq boksshy, 30 jastaǵy Djeıms Makkenzı Morrısonmen (17-0-2, 15 KO) kelissózder júrgizip jatqandyǵy týraly habarlanǵan bolatyn.

Qazaqstandyqtyń buǵan deıingi jekpe-jegi 4 tamyzda Mınskide (Belarýs) ótip, onynshy raýndta polıak Kamıl Sokolovskııdi (9-19-2, 3 KO) nokaýtqa túsirgen edi.