«Jan dosym» ániniń shyǵý tarıhyn bilesiz be
Dosym Súleev bul ándi Máskeý bolat jáne qorytpalar ınstıtýtynyń aspırantýrasynda oqyp júrgen kezinde shyǵarǵan.
«Bizdiń ansambl músheleriniń barlyǵy derlik ózderiniń qyzmet baǵytyn tańdap, túrli salalar boıynsha jumysqa kirise bastady. Men ǵylym jolyn tańdap, Máskeý bolat jáne qorytpalar ınstıtýtynyń aspırantýrasyna tústim. Bul ýaqytta ansambl múshesi Qurmanaı Omarova pedagogıkalyq jumysqa, al Shárip Omarov partııalyq qyzmetke aýysty. Máskeýge ketip bara jatqanymda ónerden ajyrap qalmas úshin olar maǵan gıtara syılaǵan bolatyn. Árıne, aspırantýrada oqı júrip, án jazýdy jalǵastyrdym. Ol kezderde «Toı jyry», «Almaty túni» sııaqty ánderim tanyla bastaǵan edi», - dep eske aldy Dosym Súleev.
Aıtýynsha, oǵan týǵan baýyrlaryndaı bolyp ketken ansambl múshelerinen alystap, Máskeýge attanǵan alǵashqy kezeń qıyn bolǵan.
«Bul kezeń júregimde, jalpy ishki jan-dúnıemde úlken iz qaldyrdy. Alǵashqy aılarda qatty qınaldym. Ásirese, ǵylymmen aınalysý ońaıǵa soqpady. Osyndaı sátterde gıtarany qolǵa alyp, shabyttanyp, án shyǵaratynmyn. Osylaısha, «Jan dosym» áni jazyldy», - deıdi ol.
Keıin Dosym Súleev «Jan dosymnyń» áýenin notaǵa túsirip, Almatydaǵy ansambl múshelerine joldaǵan.
«Bizdiń ansambl Máskeý arqyly Chehoslovakııada ótetin qoıylymǵa baratyn boldy. Jolaı men oqyǵan ýnıversıtette arnaıy kontsert uıymdastyrdy. Ǵylymı jetekshimmen, professorlarmen, akademıktermen, stýdenttermen birge aldyńǵy qatarda otyrdym. Ansambl óz repertýaryndaǵy ánderdi oryndap jatty. Kenet: «Qurmetti kórermender, taǵy bir án! Bul – Dosym Súleevtiń «Jan dosym» áni!» - dep jarııalady. Men buǵan deıin olardyń oryndaýynda bul ándi estigen emespin. Sodan keıin Qurmanaı sahnaǵa shyǵyp, «Jan dosymdy» aıta bastady. Kóńilim bosap, kózime jas keldi. Sodan beri bul án halyq arasynda keń taralyp, onyń ǵumyry áli kúnge deıin jalǵasyp keledi», - dedi týyndy avtory.
Aıta keteıik, dál osy án jazylǵan Dosym Súleevtiń gıtarasy 8 jeltoqsanda elordada ótetin XIII qysqy qaıyrymdylyq balynda aýktsıonǵa qoıylady.
