Jan bitken sýretter: Gıperrealıst sýretshiniń bir sýretke 30 saǵatyn jumsaýynyń syry nede
ASTANA. KAZINFORM — Áleýmettik jelide onyń týyndylaryn kórgender «bul jasandy ıntellektiniń jumysy» nemese «jaı ǵana fotosýret» dep senbeı jatady. Alaıda 22 jastaǵy otandyq sýretshi Dana Manarbekqyzy úshin árbir týyndy aptalap sozylatyn qajyrly eńbek pen minsizdikke umtylystyń jemisi.
Keıipkeriniń kóz janarynan bastap, terisindegi eń usaq tesikterge deıin qaǵazǵa túsiretin sheberdiń gıperrealızm baǵytyndaǵy eńbegi búginde mıllıondaǵan qaralym jınap úlgerdi.
Dananyń aıtýynsha, gıperrealızmniń kádimgi realızmnen basty aıyrmashylyǵy — detaldardyń shekten tys dáldiginde. Sýretshi bir ǵana portretti aıaqtaý úshin orta eseppen 30 saǵat ýaqytyn jumsaıdy.
— Men úshin eń mańyzdy detal — ol kóz janary. Eger men kózqarasty sýret arqyly jetkize alsam, jumystyń jartysy bitti degen sóz. Kishkentaı kezimnen portret salǵandy jaqsy kóremin. Men úshin sýretti eń usaq bólshekterine deıin dálme-dál salý mańyzdy. Ómirde de, ónerde de perfektsıonıst bolǵandyqtan, árbir shtrıhtyń ornynda bolǵanyn qalaımyn. Bir jylda shamamen 10-shaqty ǵana sýret salamyn, óıtkeni sapa ýaqytty talap etedi, — deıdi qylqalam sheberi.
Sýretshi óz jumystarynda kómir men zamanaýı grafıttik qaryndashtardy ushtastyra biledi. Bul onyń sýretterine erekshe tereńdik pen kontrast beredi.
— Men sýret salǵanda qara qaryndash pen kómirdi qatar qoldanamyn. Kómir — sýretshilerdiń eń kóne quraldarynyń biri, ol óte qanyq qara tús beredi, sol arqyly kóleńke men tereńdikti kórsetý ońaı. Al grafıttik qaryndashpen ashyq jerlerin jáne eń názik tustaryn syzamyn. Kóp adamdar meniń jumystarymdy JI nemese kseroks dep synaıdy. Soǵan jaýap retinde jaqynda robot adamnyń portretin salyp shyqtym, — deıdi ol.
7-synyptan bastap tapsyrys qabyldap, búginde iri otandyq brendtermen kollaboratsııa jasap júrgen Dananyń alǵa qoıǵan maqsaty aıqyn — ol qazaq ónerin halyqaralyq deńgeıge shyǵarǵysy keledi.
— Ózimdi bolashaqta halyqaralyq kórmelerde kóremin. Jelidegi bir postymnyń mıllıonnan astam qaralym jınaýy maǵan úlken qoldaý boldy. Eń bastysy — qandaı baǵyt bolmasyn, júrek qalaýy bolsa, toqtamaý kerek. Ónerge degen mahabbat bolsa, týabitti talanttyń bar-joǵy mańyzdy emes, bári tájirıbe men eńbekpen keledi, — dep túıindedi Dana Manarbekqyzy.
Dananyń búgingi tańdaǵy eń súıikti jumysy — «Marvel» komıksteriniń avtory Sten Lıdiń portreti. Ol sýretke 25 saǵatqa jýyq ýaqyty ketken. Aldaǵy ýaqytta jas sheber A3 formatynan áldeqaıda úlken masshtabtaǵy týyndylar salyp, jeke kórmesin ótkizýdi josparlap otyr.
Aıta keteıik, buǵan deıin tisimen sýret salatyn túrkistandyq qyz jaıly jazǵan edik.
