Jan basynyń tabysy 10 teńgege asyp ketse de áleýmettik tólem berilmeıdi - Saparbaev

ASTANA. QazAqparat - Ataýly áleýmettik kómek bir úıde turyp jatqan barlyq adamnyń kirisi eseptelinip baryp beriledi. Bul týraly búgin Úkimet úıindegi baspasóz máslıhatynda QR Premer-Mınıstriniń orynbasary Gúlshara Ábdiqalyqova aıtty, dep habarlaıdy QazAqparat tilshisi.

Shara barysynda BAQ ókilderi Eńbek jáne halyqty áleýmettik qorǵaý mınıstri Berdibek Saparbaevqa birneshe saýal qoıǵan bolatyn. Onyń birinshisi zeınettik jastaǵy ata-anasymen birge turatyn kópbalaly otbasylarǵa qatysty boldy. «Ataýly áleýmettik kómek eseptelgen kezde olardyń zeınetaqysy nazarǵa alyna ma?», - degen suraq joldandy.

Bul saýalǵa Berdibek Saparbaev: «Zeınetaqy eseptelinedi», - dep qysqa qaıyrdy.

Turǵylyqty mekenjaıǵa tirkeýge qatysty saýalǵa da mınıstr qysqa qaıyryp, kópbalaly otbasy ataýly áleýmettik kómek alatyn jerde mindetti túrde tirkeýge turýy tıistigin atap ótti.

Sondaı-aq ol jan basyna shaqqandaǵy tabys 20789 teńgeden 10-15 teńgege asyp ketse, onda ataýly áleýmettik kómek berilmeıtindigin ashyq aıtty.

«Tártip solaı. Solaı dep bekitilgen. 20 789 teńge. Odan assa, ilinbeıdi (ataýly áleýmettik kómekke - avt)», - dedi mınıstr.

Baspasóz máslıhatyna qatysqan vıtse-premer Gúlshara Ábdiqalyqova da ataýly áleýmettik kómek bergen kezde tártiptiń bolýy tıistigin atap ótti.

«Qandaı kómek beretin bolsaq ta, tártip bolýy kerek. Belgili shek bolýy shart. Otbasy birge turǵandyqtan, bir úıde turatyndyqtan barlyq kiris esepteledi. Altyn alqa, Kúmis alqa boıynsha tólemder, múgedek bala kútimine beriletin járdemaqylar ǵana eseptelinbeıdi», - dedi Gúlshara Ábdiqalyqova.